Esteriñizde bolsa, jıl basınan beri Nwr-Swltan qalasında «Til tazalığı – barşağa ortaq is» jobası bastau alğan edi. Qalalıq Tilderdi damıtu jäne arhiv isi basqarması atqarılğan şaralar turalı tolımdı aqparat ta bergen. Endi, mine jaña oqu mausımı bastalğan mezette joba qaytadan qızu qarqın aldı.

Aqparattıq-ideologiyalıq sipattağı auqımdı äri keşendi is-şara ötkizu kezek küttirmeytin mäsele ekenin aytqan edik. Osığan oray, "Til tazalığı - barşağa ortaq is" jobası ayasında Nwr-Swltan qalası äkiminiñ orınbasarı M. Bektwrova akciyanıñ ekinşi kezeñin bastağan bolatın.
Malika Erlanqızı audan äkimdikteri men qwzırlı organdarğa sırtqı (körneki) jarnamağa qatıstı naqtı tapsırmalar berdi.
Resmi organ qızmetkerleri men qoğam belsendilerinen qwralğan arnayı jwmıs tobı Til zañnaması talaptarınıñ saqtaluı bağıtındağı jwmıstardı ülken auqımda jalğastıruğa kiristi.

Sonımen, akciyanıñ kezekti şarası jeke menşik balabaqşalardan bastaldı. Onıñ özindik mäni de joq emes. Büldirşinder eldiñ erteñgi iesi, memlekettik tildi arı qaray örkendetip, är salada berik ornıqtıratın janaşırları ekeni mälim. Bala baqşadağı til tazalığı - wrpaq sanasınıñ tazalığı ekeni  de dausız. Bwdan bwrın akciya ayasında jürgizilgen jwmıstar boyınşa jekemenşik balabaqşalardıñ sırtqı jarnaması men körneki aqparattarınıñ sın kötermeytindigi anıqtalğan. Elordamızda 210 jekemenşik balabaqşa bolsa, köp böliginiñ mañdayşa atauları men sırtqı (körneki)  jarnaması til turalı zañnıñ talaptarına say emes bolıp şıqqan.

Endi mine, naqtı is qolğa alınıp, Tilderdi damıtu jäne arhiv isi Basqarması jäne Nwr-Swltan qalalıq käsipkerler palatası birigip jeke balabaqşa basşılarınıñ basın qosqan jiın aştı. Jiındı Basqarmanıñ Bas mamanı Aygül Ğizatqızı şaranıñ mañızına toqtala kelip, Memlekettik til normaların orındau, qatelikterdi tüzeu boyınşa naqtı talaptar qoydı. Qarsı saual qoyğandarğa zañ ayasında jäne tilge janaşır nietimen sauattı jauaptar berdi. Jiınğa qatısqan memlekettik mekeme qızmetkerleri oyların bildirip, zañdı qatañ saqtau kerektigin basa ayttı. Jeke menşik bala baqşa basşılarına Til turalı Zañınıñ talaptarı jan-jaqtı tüsindirilip, ädistemelik kömek körsetildi.

Qazirgi tañda memlekettik tildiñ qoğamdağı ayası kün sayın artıp kele jatqanı anıq. Alayda, nemqwraylıq tanıtıp, Til turalı zañğa salğırt qaraytındar da joq emes. Bwl jağday endi jiti nazarda bolmaq. Aldağı uaqıtta, qala äkiminiñ orınbasarı M. Bektwrovanıñ bekitken tapsırma - josparına säykes, jekemenşik balabaqşalardıñ sırtqı (körneki) jarnamasına Basqarma tarapınan monitoring jürgiziledi jäne onıñ qorıtındısı aşıq türde jariyalanadı. Qalanıñ tört audanın qamtığan bwl auqımdı akciya özge bağıttarda da jalğasın tabadı. Oğan memlekettik mekeme ökilderi men sauattı qoğam belsendilerinen qwralğan sarapşılar atsalısatın boladı. Barlıq nätije, atqarılğan şara äleumettik jeliler men BAQ-ta elge jetip otıradı.

Jaqında prezident Q.Toqaev öziniñ twñğış Joldauında "Qazaq tilin wltaralıq qatınas tiline aynaldıratın uaqıt keletinin" aytıp edi. Atalğan şara memleket basşısınıñ osı ideyasına ün qospaq. Büginde memlekettik tildiñ ahualı, äsirese elordamız Nwr-Swltan qalasındağı qazaq tiliniñ talapqa say boluı qatañ qadağalanuğa köşti.

Ötken aptada elorda äkimi Altay Kölginov Halıqaralıq «Qazaq tili» qoğamdıq birlestiginiñ Nwr-Swltan qalalıq filialınıñ jaña qwramın qabıldağan bolatın. Basqosu kezinde qaladağı qazaq tilindegi sauatsız jarnamalardı tüzetu jayı nazardan tıs qalğan joq. Bwl twrğıda "Til saqşısı" sındı bwrınğı birqatar jobanı qayta jañğırtu da aytıldı. Altay Seydirwlı birlestik müşeleriniñ memlekettik tilge qatıstı wsınıstarın  qoldaytının bildirdi.

Memlekettik tildi damıtu, ayasın keñeytu el bolaşağı üşin öte özekti, mañızdı strategiyalıq bağıttıñ biri. Wlttıq sayasattıñ negizi bolıp sanalatın til mäselesi qoğam nazarın özine bwrıp otırğanı belgili. Qazaq tilin qoldanu zañ talaptarına say boluı köptiñ qoldauına ie bolıp otırğanın ayta ketken jön. Osığan oray, «Til tazalığı – barşağa ortaq is» jobası ayasında da köptegen kemşilikterdiñ qalıpqa kelip, qaladağı til tazalığı küşeye tüsetinine senemiz.

Mwrat Almasbekwlı

"The Qazaq Times"