Prezident Toqaev Qıtaydağı alğaşqı saparında. Foto: Xinlang.

Qazaqstan Respublikasınıñ prezidenti Qasım-Jomart Toqaev keşe Qıtay Halıq Respublikasındağı saparı barısında Qıtay basşısı Şi Jinpiñmen kezdesti. Qıtay basşısı Halıq sarayınıñ aldında QR prezidentin saltanatpen kütip alıp, taraptar keñeytilgen kezdesuler ötkizdi.

Qazaqstan prezidentin kütip alu räsiminde Qıtay basşısı Şi Jinpiñmen birge Qıtay SİM basşısı Uañ I, QHR sırtqı ister jönindegi ortalıq komitettiñ jetekşisi YAñ Jieçı jäne özge de birqatar joğarı lauazımdı twlğaları qatıstı.

Qıtay basşısı Qıtay jetistikterin köbirek söz etti

Kezdesude Qıtay basşısı Qıtaydıñ alda kele jatqan 70 jıldıq merey toyı turalı toqtalıp, 70 jıl işindegi Qıtaydıñ jetken jetistikteri turalı köl-kösir sözderge orın bergen. Sırtqı älemdegi özgeristerge qaramastan, Qıtay öziniñ reformaların jalğastıra beretinin aytqan. Sonday-aq, «Qazaqstan men Qıtay qatınası – tatu körşilik, dostıqtıñ ülgisi» dep bağalay kelip, Qıtay tarabı Qazaqstanmen jan-jaqtı ıntımaqtastıqtı tereñdetuge jäne «Jibek jolı jaña ekonomikalıq beldeui» jobasın men «Nwrlı jol» jaña ekonomikalıq sayasatın jüzege asıruda qoldau körsetetinin bildirgen.

Toqaev: QR bwrınğı prezidenti men Qıtay basşısı jasasqan kelisimder küşinde qala beredi

Prezident Toqaev kezdesudegi sözin Qıtaydıñ 70 jıldıq merey toyımen qwttıqtaumen bastap, eki el arasındağı twraqtı diplomatiyalıq qatınastıñ joğarı deñgeyde ekenin atap ötken. Qıtaydıñ birqatar jetistikterin atay kelip, Qıtay reforması men damuınıñ Qazaqstanğa bolğan ıqpalı turalı da söz etken. Äri Qazaqstan biligi Qıtaydıñ ükimeti men halqına wlttıq egemendigine, qauipsizdigine jäne damuına qoldau körsetetinin jetkizgen. Sonımen birge, Qazaqstan men Qıtaydıñ qarım-qatınasın damıtuğa dayın ekenin de bildirdi.

Toqaev kezdesu kezinde Qıtay basşısına Qazaqstannıñ «Bir beldeu, Bir jol» jobası ayasında Qıtaymen joğarı deñgeydegi baylanıstardı ornatuğa, sonday-aq, ekonomika, sauda, infraqwrılım, energetika, 5G tehnologiyası, ğılım-tehnologiya jäne gumanitarlıq salalardağı pragmatikalıq ıntımaqtastıqtı nığaytuğa ıntalı dep atadı. Bwğan qosa, Eki tarap «Üş küşke» qarsı twru, aymaqtıq qauipsizdikti saqtau jäne sırtqı aralasuğa qarsı twru üşin Şanhay ıntımaqtastıq wyımı men AziyaInfo ayasında tığız baylanıs ornatıp, ıntımaqtasuı kerek dep körsetti.

Qıtay ükimetiniñ joğarı lauazımdılarımen kezdesuler jäne biznes ökilderiniñ kezdesuinde prezident Toqaev Qazaqstan-Qıtay arasında sauda kölemi barğan sayın artıp kele jatqanın, täuelsizdikten beri qaray Qıtaydıñ Qazaqstanğa 20 mlrd dollar köleminde investiciya salğanın aytqan. Sonımen birge, Qazaqstan Qıtayğa bağıttalğan biday eksportın 3 esege arttıruğa dayın ekeninde bildirgen. Toqaev saparı barısında Qazaqstannıñ bwrınğı prezidenti men Qıtay basşısı arasında jasalğan kelisimderdiñ saqtalatının mälimdegen.

Toqaevtıñ qıtay tilin erkin söyleui qıtay äleumettik jelilerinde 

Qazaqstan prezidenti Qasım-Jomart Toqaevtıñ Qıtaydağı alğaşqı resmi saparı qarsañında Qıtaydıñ äleumettik jelilerinde Toqaevtıñ qıtay tilin erkin söyleytini köbirek söz boldı. Prezident Toqaevtıñ qıtay ieroglifinde jazğan qwttıqtauı Qıtaydıñ birqatar aqparat qwraldarınıñ bastı taqırıbına aynalğan.

Alayda, el işindegi keybir sarapşılar Toqaevtıñ Qıtay saparı ekonomikalıq täueldilikti tereñdetedi degen közqarastar da aytadı.

“The Qazaq Times”