توقاەۆتىڭ قىتاي ساپارى: قىتاي الەۋمەتتىك جەلىلەرىندەگى قازاقستان پرەزيدەنتى

قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ كەشە قىتاي حالىق رەسپۋبليكاسىنداعى ساپارى بارىسىندا قىتاي باسشىسى شي جينپيڭمەن كەزدەستى. قىتاي باسشىسى حالىق سارايىنىڭ الدىندا قر پرەزيدەنتىن سالتاناتپەن كۇتىپ الىپ، تاراپتار كەڭەيتىلگەن كەزدەسۋلەر وتكىزدى.

قازاقستان پرەزيدەنتىن كۇتىپ الۋ راسىمىندە قىتاي باسشىسى شي جينپيڭمەن بىرگە قىتاي ءسىم باسشىسى ۋاڭ ي، قحر سىرتقى ىستەر جونىندەگى ورتالىق كوميتەتتىڭ جەتەكشىسى ياڭ جيەچى جانە وزگە دە بىرقاتار جوعارى لاۋازىمدى تۇلعالارى قاتىستى.

قىتاي باسشىسى قىتاي جەتىستىكتەرىن كوبىرەك ءسوز ەتتى

كەزدەسۋدە قىتاي باسشىسى قىتايدىڭ الدا كەلە جاتقان 70 جىلدىق مەرەي تويى تۋرالى توقتالىپ، 70 جىل ىشىندەگى قىتايدىڭ جەتكەن جەتىستىكتەرى تۋرالى كول-كوسىر سوزدەرگە ورىن بەرگەن. سىرتقى الەمدەگى وزگەرىستەرگە قاراماستان، قىتاي ءوزىنىڭ رەفورمالارىن جالعاستىرا بەرەتىنىن ايتقان. سونداي-اق، «قازاقستان مەن قىتاي قاتىناسى – تاتۋ كورشىلىك، دوستىقتىڭ ۇلگىسى» دەپ باعالاي كەلىپ، قىتاي تارابى قازاقستانمەن جان-جاقتى ىنتىماقتاستىقتى تەرەڭدەتۋگە جانە «جىبەك جولى جاڭا ەكونوميكالىق بەلدەۋى» جوباسىن مەن «نۇرلى جول» جاڭا ەكونوميكالىق ساياساتىن جۇزەگە اسىرۋدا قولداۋ كورسەتەتىنىن بىلدىرگەن.

توقاەۆ: قر بۇرىنعى پرەزيدەنتى مەن قىتاي باسشىسى جاساسقان كەلىسىمدەر كۇشىندە قالا بەرەدى

پرەزيدەنت توقاەۆ كەزدەسۋدەگى ءسوزىن قىتايدىڭ 70 جىلدىق مەرەي تويىمەن قۇتتىقتاۋمەن باستاپ، ەكى ەل اراسىنداعى تۇراقتى ديپلوماتيالىق قاتىناستىڭ جوعارى دەڭگەيدە ەكەنىن اتاپ وتكەن. قىتايدىڭ بىرقاتار جەتىستىكتەرىن اتاي كەلىپ، قىتاي رەفورماسى مەن دامۋىنىڭ قازاقستانعا بولعان ىقپالى تۋرالى دا ءسوز ەتكەن. ءارى قازاقستان بيلىگى قىتايدىڭ ۇكىمەتى مەن حالقىنا ۇلتتىق ەگەمەندىگىنە، قاۋىپسىزدىگىنە جانە دامۋىنا قولداۋ كورسەتەتىنىن جەتكىزگەن. سونىمەن بىرگە، قازاقستان مەن قىتايدىڭ قارىم-قاتىناسىن دامىتۋعا دايىن ەكەنىن دە ءبىلدىردى.

توقاەۆ كەزدەسۋ كەزىندە قىتاي باسشىسىنا قازاقستاننىڭ «ءبىر بەلدەۋ، ءبىر جول» جوباسى اياسىندا قىتايمەن جوعارى دەڭگەيدەگى بايلانىستاردى ورناتۋعا، سونداي-اق، ەكونوميكا، ساۋدا، ينفراقۇرىلىم، ەنەرگەتيكا، 5G تەحنولوگياسى، عىلىم-تەحنولوگيا جانە گۋمانيتارلىق سالالارداعى پراگماتيكالىق ىنتىماقتاستىقتى نىعايتۋعا ىنتالى دەپ اتادى. بۇعان قوسا، ەكى تاراپ «ءۇش كۇشكە» قارسى تۇرۋ، ايماقتىق قاۋىپسىزدىكتى ساقتاۋ جانە سىرتقى ارالاسۋعا قارسى تۇرۋ ءۇشىن شانحاي ىنتىماقتاستىق ۇيىمى مەن ازياينفو اياسىندا تىعىز بايلانىس ورناتىپ، ىنتىماقتاسۋى كەرەك دەپ كورسەتتى.

قىتاي ۇكىمەتىنىڭ جوعارى لاۋازىمدىلارىمەن كەزدەسۋلەر جانە بيزنەس وكىلدەرىنىڭ كەزدەسۋىندە پرەزيدەنت توقاەۆ قازاقستان-قىتاي اراسىندا ساۋدا كولەمى بارعان سايىن ارتىپ كەلە جاتقانىن، تاۋەلسىزدىكتەن بەرى قاراي قىتايدىڭ قازاقستانعا 20 ملرد دوللار كولەمىندە ينۆەستيتسيا سالعانىن ايتقان. سونىمەن بىرگە، قازاقستان قىتايعا باعىتتالعان بيداي ەكسپورتىن 3 ەسەگە ارتتىرۋعا دايىن ەكەنىندە بىلدىرگەن. توقاەۆ ساپارى بارىسىندا قازاقستاننىڭ بۇرىنعى پرەزيدەنتى مەن قىتاي باسشىسى اراسىندا جاسالعان كەلىسىمدەردىڭ ساقتالاتىنىن مالىمدەگەن.

توقاەۆتىڭ قىتاي ءتىلىن ەركىن سويلەۋى قىتاي الەۋمەتتىك جەلىلەرىندە 

قازاقستان پرەزيدەنتى قاسىم-جومارت توقاەۆتىڭ قىتايداعى العاشقى رەسمي ساپارى قارساڭىندا قىتايدىڭ الەۋمەتتىك جەلىلەرىندە توقاەۆتىڭ قىتاي ءتىلىن ەركىن سويلەيتىنى كوبىرەك ءسوز بولدى. پرەزيدەنت توقاەۆتىڭ قىتاي يەروگليفىندە جازعان قۇتتىقتاۋى قىتايدىڭ بىرقاتار اقپارات قۇرالدارىنىڭ باستى تاقىرىبىنا اينالعان.

الايدا، ەل ىشىندەگى كەيبىر ساراپشىلار توقاەۆتىڭ قىتاي ساپارى ەكونوميكالىق تاۋەلدىلىكتى تەرەڭدەتەدى دەگەن كوزقاراستار دا ايتادى.

“The Qazaq Times”