Qoğam tarapınan jii sınğa wşıraytın QHR-nıñ Qazaqstandağı elşisi Çjan Syao 27,5 milliondıq sertiıikat tabıstauda. 5 qırküyek 2019 jıl. Foto: G.Ramanqwlova

Qıtay elşiligi Bilim ministrligine 27,5 mln teñgege qıtay tilindegi kitaptar men oqu qwraldarın alıp berdi. Elşilik sıylağan oqu qwraldarı qıtay tilin oqıtatın astanalıq 4 mektep pen özge öñirlerdegi oqu ordalarına tabıstaladı.  

Esteriñizde bolsa, bıltır 1 jeltoqsan eks-prezident N.Nazarbaev öziniñ atındağı ziyatkerlik mektep oquşılarınıñ qıtay tilin üyrenuiniñ mañızı zor ekenin atap ötken bolatın. NZM-de 9 jıldan beri qıtay tili oqıtılıp keledi.

Ekijaqtı «dostıq qatınastı» nığaytu, qazaqstandıq oquşılardıñ qıtay tiline degen qızığuşılığın arttıru maqsatında Qazaqstandağı QHR elşiligi QR Bilim jäne ğılım ministrligine qıtay tiliniñ oqulıqtarın sıyladı.

Elşi Çjan Syao jiınğa kelgen «balalar men mwğalimderdi» körgenine  quanıştı ekenin jetkizip, astanalıq  4 mektepte qıtay tili oqıtılatının ayttı.

– Qıtay tilin oqu – eki el arasın jaqındatatın ruhani qwral. Sondıqtan biz twrğındar bir-birin jaqsı tanığanın, üyreniskenin qalaymız, – dedi Syao. Ol söz barısında Nazarbaevtıñ  qıtay tilin üyrenuge män bergenin, Toqaevtıñ Konfuciy institutın köbeytudi qoldaytının ayttı. Jalpı Çjan Syao qazaq qoğamına BAQ betterindegi  döreki pikirleri  tanılıp, osığan deyin biraz sınğa ilikken.

QR eks-prezidenti N.Nazarbaev pen QHR törağası Si Czin'pinmen kelisimşarttarğa qol qoyuda. 8 mausım 2019 jıl. QHR. Foto: Aqorda

QR BĞM Halıqaralıq ıntımaqtastıq departamenti direktorınıñ mindetin atqaruşı El'mira Asannıñ aytuınşa, eki el arasında ükimetaralıq kelisim ayasında studentter üşin jıl sayın 100-ge juıq grant bölinedi. Qazirgi tañda Qıtaydağı JOO 1300-ge juıq qazaqstandıq student bilim aluda.

Qıtay tilin üyrenuge arnalğan oqulıqtar. 5 qırküyek 2019 jıl. Foto: G.Ramanqwlova

Astanadağı NZM-niñ  direktorı Meyram Jakenov aşılğanına 10 jıl tolğan bilim ordasında 9 jıldan beri qıtay tili oqıtılıp jatqanın erekşe atap ötti. Sonımen qatar, №81 «Astana English School» gimnaziyasınıñ direktorı Gülnar Sadıqova özi basqarıp otırğan oqu ornında oquşılar qıtay tilin ekinşi til retinde 2-sınıptap bastap meñgeretinin ayttı.

«Qıtay tili ağılşın tilinen keyin ekinşi şet tili retinde 2-sınıptan bastap oqıtıladı. Biz eki eldiñ dostıq qarım-qatınasın joğarı bağalaymız. Äri bwl ıntımaqtastıq jalğasın taba beredi degen ümittemiz», - dedi 81 gimnaziyanıñ direktorı.

Çjan Syaomen birge astanlıq oquşılar. 5 qırküyek 2019 jıl. Foto: G.Ramanqwlova

Qıtayşa än aytıp twrğan qazaqstandıq oquşılar. 5 qırküyek 2019 jıl. Foto: G.Ramanqwlova

Esteriñizge sala ketsek, 2 qırküyekten beri Jañaözen qalasında bastalıp, respublikanıñ 10 şaqtı qalasında qoldau tapqan «ükimetaralıq 55 jobağa», «Qıtay ekspansiyasına» qarsılıq akciyaların İİM «rwqsat etilmegen jiın» retinde tanıp, «kez kelgen zañsız şerudiñ jolın kesetinin» mälimdedi. Köşirilmeytin, – birlesip salınatın «joğarı tehnologiyalıq su jaña» jobalar jaylı  2019 jılı säuirde Qazaqstannıñ eks-prezidenti N.Nazarbaev Beyjiñde ötken «Bir beldeu – bir jol» forumında Qıtaydıñ Qazaqstandağı 55 iri jobasınıñ 15-i jwmısın bastağanın, 11 nısan biıl paydalanuğa beriletinin aytqan edi. Qıtayğa qarsı bwqaralıq köñil-küy 2016 jılğı jalpıhalıqtıq jer dauınan bastalıp,  BWW men älemdik örkenietti elder tarapınan sınalğan Şıñjañdağı qısım körip jatqan mıñdağan qazaqtardıñ «arnayı lager'lerde wstaluı» habarınan keyin örşi tüsken.

Jañaözendikterdi qoldau jäne Qıtay ekspansiyasına qarsı 6 sağat boyı ötip jatqan Almatıdağı akciya. Almatı qalası. 4 qırküyek 2019 jıl. Foto: QT |

"The Qazaq Times"