قوعام تاراپىنان ءجيى سىنعا ۇشىرايتىن قحر-نىڭ قازاقستانداعى ەلشىسى چجان سياو 27,5 ميلليوندىق سەرتيىيكات تابىستاۋدا. 5 قىركۇيەك 2019 جىل. فوتو: گ.رامانقۇلوۆا

قىتاي ەلشىلىگى ءبىلىم مينيسترلىگىنە 27,5 ملن تەڭگەگە قىتاي تىلىندەگى كىتاپتار مەن وقۋ قۇرالدارىن الىپ بەردى. ەلشىلىك سىيلاعان وقۋ قۇرالدارى قىتاي ءتىلىن وقىتاتىن استانالىق 4 مەكتەپ پەن وزگە وڭىرلەردەگى وقۋ وردالارىنا تابىستالادى.  

ەستەرىڭىزدە بولسا، بىلتىر 1 جەلتوقسان ەكس-پرەزيدەنت ن.نازارباەۆ ءوزىنىڭ اتىنداعى زياتكەرلىك مەكتەپ وقۋشىلارىنىڭ قىتاي ءتىلىن ۇيرەنۋىنىڭ ماڭىزى زور ەكەنىن اتاپ وتكەن بولاتىن. نزم-دە 9 جىلدان بەرى قىتاي ءتىلى وقىتىلىپ كەلەدى.

ەكىجاقتى «دوستىق قاتىناستى» نىعايتۋ، قازاقستاندىق وقۋشىلاردىڭ قىتاي تىلىنە دەگەن قىزىعۋشىلىعىن ارتتىرۋ ماقساتىندا قازاقستانداعى قحر ەلشىلىگى قر ءبىلىم جانە عىلىم مينيسترلىگىنە قىتاي ءتىلىنىڭ وقۋلىقتارىن سىيلادى.

ەلشى چجان سياو جيىنعا كەلگەن «بالالار مەن مۇعالىمدەردى» كورگەنىنە  قۋانىشتى ەكەنىن جەتكىزىپ، استانالىق  4 مەكتەپتە قىتاي ءتىلى وقىتىلاتىنىن ايتتى.

– قىتاي ءتىلىن وقۋ – ەكى ەل اراسىن جاقىنداتاتىن رۋحاني قۇرال. سوندىقتان ءبىز تۇرعىندار ءبىر-ءبىرىن جاقسى تانىعانىن، ۇيرەنىسكەنىن قالايمىز، – دەدى سياو. ول ءسوز بارىسىندا نازارباەۆتىڭ  قىتاي ءتىلىن ۇيرەنۋگە ءمان بەرگەنىن، توقاەۆتىڭ كونفۋتسي ينستيتۋتىن كوبەيتۋدى قولدايتىنىن ايتتى. جالپى چجان سياو قازاق قوعامىنا باق بەتتەرىندەگى  دورەكى پىكىرلەرى  تانىلىپ، وسىعان دەيىن ءبىراز سىنعا ىلىككەن.

قر ەكس-پرەزيدەنتى ن.نازارباەۆ پەن قحر توراعاسى سي تسزينپينمەن كەلىسىمشارتتارعا قول قويۋدا. 8 ماۋسىم 2019 جىل. قحر. فوتو: اقوردا

قر بعم حالىقارالىق ىنتىماقتاستىق دەپارتامەنتى ديرەكتورىنىڭ مىندەتىن اتقارۋشى ەلميرا اساننىڭ ايتۋىنشا، ەكى ەل اراسىندا ۇكىمەتارالىق كەلىسىم اياسىندا ستۋدەنتتەر ءۇشىن جىل سايىن 100-گە جۋىق گرانت بولىنەدى. قازىرگى تاڭدا قىتايداعى جوو 1300-گە جۋىق قازاقستاندىق ستۋدەنت ءبىلىم الۋدا.

قىتاي ءتىلىن ۇيرەنۋگە ارنالعان وقۋلىقتار. 5 قىركۇيەك 2019 جىل. فوتو: گ.رامانقۇلوۆا

استاناداعى نزم-ءنىڭ  ديرەكتورى مەيرام جاكەنوۆ اشىلعانىنا 10 جىل تولعان ءبىلىم ورداسىندا 9 جىلدان بەرى قىتاي ءتىلى وقىتىلىپ جاتقانىن ەرەكشە اتاپ ءوتتى. سونىمەن قاتار، №81 «Astana English School» گيمنازياسىنىڭ ديرەكتورى گۇلنار سادىقوۆا ءوزى باسقارىپ وتىرعان وقۋ ورنىندا وقۋشىلار قىتاي ءتىلىن ەكىنشى ءتىل رەتىندە 2-سىنىپتاپ باستاپ مەڭگەرەتىنىن ايتتى.

«قىتاي ءتىلى اعىلشىن تىلىنەن كەيىن ەكىنشى شەت ءتىلى رەتىندە 2-سىنىپتان باستاپ وقىتىلادى. ءبىز ەكى ەلدىڭ دوستىق قارىم-قاتىناسىن جوعارى باعالايمىز. ءارى بۇل ىنتىماقتاستىق جالعاسىن تابا بەرەدى دەگەن ۇمىتتەمىز»، - دەدى 81 گيمنازيانىڭ ديرەكتورى.

چجان سياومەن بىرگە استانلىق وقۋشىلار. 5 قىركۇيەك 2019 جىل. فوتو: گ.رامانقۇلوۆا

قىتايشا ءان ايتىپ تۇرعان قازاقستاندىق وقۋشىلار. 5 قىركۇيەك 2019 جىل. فوتو: گ.رامانقۇلوۆا

ەستەرىڭىزگە سالا كەتسەك، 2 قىركۇيەكتەن بەرى جاڭاوزەن قالاسىندا باستالىپ، رەسپۋبليكانىڭ 10 شاقتى قالاسىندا قولداۋ تاپقان «ۇكىمەتارالىق 55 جوباعا»، «قىتاي ەكسپانسياسىنا» قارسىلىق اكتسيالارىن ءىىم «رۇقسات ەتىلمەگەن جيىن» رەتىندە تانىپ، «كەز كەلگەن زاڭسىز شەرۋدىڭ جولىن كەسەتىنىن» مالىمدەدى. كوشىرىلمەيتىن، – بىرلەسىپ سالىناتىن «جوعارى تەحنولوگيالىق سۋ جاڭا» جوبالار جايلى  2019 جىلى ساۋىردە قازاقستاننىڭ ەكس-پرەزيدەنتى ن.نازارباەۆ بەيجىڭدە وتكەن «ءبىر بەلدەۋ – ءبىر جول» فورۋمىندا قىتايدىڭ قازاقستانداعى 55 ءىرى جوباسىنىڭ 15-ءى جۇمىسىن باستاعانىن، 11 نىسان بيىل پايدالانۋعا بەرىلەتىنىن ايتقان ەدى. قىتايعا قارسى بۇقارالىق كوڭىل-كۇي 2016 جىلعى جالپىحالىقتىق جەر داۋىنان باستالىپ،  بۇۇ مەن الەمدىك وركەنيەتتى ەلدەر تاراپىنان سىنالعان شىڭجاڭداعى قىسىم كورىپ جاتقان مىڭداعان قازاقتاردىڭ «ارنايى لاگەرلەردە ۇستالۋى» حابارىنان كەيىن ءورشي تۇسكەن.

جاڭاوزەندىكتەردى قولداۋ جانە قىتاي ەكسپانسياسىنا قارسى 6 ساعات بويى ءوتىپ جاتقان الماتىداعى اكتسيا. الماتى قالاسى. 4 قىركۇيەك 2019 جىل. فوتو: QT |

"The Qazaq Times"