مەملەكەت باسشىسى ق.توقاەۆتى اتىراۋ وبلىسىنىڭ اكىمى ن.نوعاەۆ كۇتىپ الۋدا. 5 قىركۇيەك 2019 جىل. فوتو: بەرىك ءۋاليدىڭ فەيزبۋك پاراقشاسىنان

5 قىركۇيەك ءتۇس مەزگىلىندە ەل پرەزيدەنتى  قاسىم-جومارت توقاەۆ جۇمىس ساپارىمەن اتىراۋ وبلىسىنا كەلدى.

مەملەكەت باسشىسىنىڭ ءىس-ساپارى جايلى ونىڭ حاتشىسى بەرىك ءۋالي ءوزىنىڭ جەكە پاراقشاسىندا:

– مەملەكەت باسشىسى وبلىستىڭ مۇناي سەرۆيستىك كاسىپورىندارىنىڭ بىرىنە بارىپ، قازاقستاننىڭ مۇناي-گاز سالاسىن دامىتۋ ماسەلەلەرى جونىندە كەڭەيتىلگەن كەڭەس وتكىزەدى.

ساپار باعدارلاماسىنا سونداي-اق قاسىم-جومارت توقاەۆتىڭ قازاقستان مۇنايىنىڭ 120 جىلدىعىنا ارنالعان سالتاناتتى جيىنعا قاتىسۋى جوسپارلانعان، – دەپ جازدى.

اقوردا سايتى مەن الەۋمەتتىك جەلىلەردەگى پاراقشالارىندا ءالى رەسمي اقپارات جاريالانا قويعان جوق.  بەرىك ءۋالي ۇسىنعان ماتەريالعا قاراعاندا، توقاەۆتى 2016 جىلدىڭ 26 ناۋرىزىنان ءوڭىردى باسقارىپ كەلە جاتقان وبلىس اكىمى نۇرلان نوعاەۆ كۇتىپ العان.

650 مىڭعا تارتا تۇرعىنى بار وبلىستاعى تەڭىز كەن ورنى مەن كاسپي قايراڭىنداعى مۇناي قورى قازاقستان بويىنشا انىقتالعان قورلار مەن رەسۋرستاردىڭ 80%-ىن قۇرايدى. ءۇش كۇننەن بەرى «قازاقستاندا جۇزەگە اسىرىلاتىن قىتايمەن بىرلەسكەن 55 جوباعا قارسىلىق»، «قىتاي ەكسپانسياسىنا» نارازىلىق ءبىلدىرىپ، پرەزيدەنتتىڭ كەلۋىن، اتالمىش ەكونوميكالىق شەشىمنەن باس تارتۋىن تالاپ ەتىپ، توقاەۆتان قىركۇيەكتىڭ 11-12-سىنە جوسپارلانعان قحر-نا بارماۋىن سۇراعان جاڭاوزەندىكتەرگە پرەزيدەنت ازىرگە مويىن بۇرا قويعان جوق.

ەستەرىڭىزگە سالا كەتسەك، 2 قىركۇيەكتەن بەرى جاڭاوزەن قالاسىندا باستالىپ، رەسپۋبليكانىڭ 10 شاقتى قالاسىندا قولداۋ تاپقان «قىتاي ەكسپانسياسىنا» قارسىلىق اكتسيالارىن ءىىم «رۇقسات ەتىلمەگەن جيىن» رەتىندە تانىپ، «اتالمىش 55 زاۋىت كوشىرىلەتىنىن» جوققا شىعارعان ەدى. سويتە تۇرا الماتى قالاسى اكىمىنىڭ ورىنباسارى ساپاربەك تۇياقباەۆ 55 زاۋىتتى ەكونوميكالىق-ينۆەستيتسيالىق بىرلەسكەن جوبا ەكەنىن راستاپ، «تۇركىستان وبلىسىنداعى تۇيە ءسۇتىن وندىرەتىن» كاسىپورىنىن مىسالعا كەلتىردى. كەشەگى نارازىلىقتا ءسوز اراسىندا تۇياقباەۆ قىتايدان باسقا دا كوپتەگەن وركەنيەتتى، دامىعان ەلدەرمەن جالپى جيىنى «ءىرى 185 جوبا جاسالعاندىعىن» مالىمدەپ، مۇنىڭ ەكونوميكالىق قاجەتتىلىك ەكەنىن تۇسىندىرۋگە تىرىستى.

قالا اكىمىنىڭ ورىنباسارى ساپاربەك تۇياقباەۆ نارازىلارعا 55 جوبانىڭ بۇگە-شۇگەسىنە دەيىن ءتۇسىندىرىپ بەرۋگە دايىن ەكەنىن ايتىپ تۇر. الماتى قالاسى. 4 قىركۇيەك 2019 جىل. فوتو: QT

كوشىرىلمەيتىن، – بىرلەسىپ سالىناتىن جوبالار جايلى  2019 جىلى ساۋىردە قازاقستاننىڭ ەكس-پرەزيدەنتى ن.نازارباەۆ بەيجىڭدە وتكەن «ءبىر بەلدەۋ – ءبىر جول» فورۋمىندا قىتايدىڭ قازاقستانداعى 55 ءىرى جوباسىنىڭ 15-ءى جۇمىسىن باستاعانىن، 11 نىسان بيىل پايدالانۋعا بەرىلەتىنىن ايتقان ەدى.

"The Qazaq Times"