Irannıñ jerserik tasımal zımıranı. Foto: VOA.

AQŞ alğaş ret Irannıñ ğarıştıq agenttigin sankciya tizimine engizdi. Uaşington Irandı zımıran bağdarlamaların jasırıp qalu üşin ğarıştıq bağdarlamanı paydalanğan dep ayıptağan.

«Qwrama Ştat Irannıñ ballistikalıq zımıran bağdarlamaların ğarıştıq wşıru bağdarlamalarımen kölegeyleuine jol bermeydi dedi», – AQŞ-tıñ mem. hatşısı Mayk Pompeo seysenbi küni jasağan mälimdemesinde.

Jaña sankciya Irannıñ ğarış agenttigi, Ğarıştıq zertteuler ortalığı jäne Aeronavtika institutı qatarlı ortalıqtarı men käsiporındarına bağıttaladı.  Sankciya talabı boyınşa Qwrama Ştat osı orındardıñ aktivterin bwğattaydı jäne amerikalıqtardıñ olarmen jwmıs jürgizuine tıyım saladı.

AQŞ-tıñ mälimdeuinşe, Iran ğarışqa wşıratın zımırandardı ballistikalıq zımıran tehnikasın paydalanıp jasaydı nemese soğan özgertedi. Wşıru kezindegi jäne wşu küyindegi zımırandı basqaru ädisteri de ballistikalıq zımırandardı basqaru ädisimen birdey ekenin alğa tartqan.

Resmi Uaşington Irannıñ ballistikalıq zımıran bağdarlaması üşin Halıqaralıq ğılımi qauımdastıqtı da sınğa alğan. Mälimetke qarağanda, Halıqaralıq ğılımi qauımdastıq pen Irannıñ ğarıştıq apparattar salasındağı ıntımaqtastığı ballistikalıq zımıran bağdarlamasın jüzege asıruına kömektesedi.

Alayda, Iran özine tağılğan ayıptardı joqqa şığardı, äri ğarıştıq bağdarlamalarınıñ maqsatı baylanıs jerserikteri (sputnik) üşin zımırandar jasau ekenin alğa tarttı.

Iran 2013 jıldan beri eki birdey baylanıs jerserigin orbitağa şığarğan. Alayda, biılğı jılğa josparlanğan üş retki wşıru sätsizdikke wşıradı. Bwdan biraz bwrın wşıru alañında bir zımıranı jarılıp ketti.

BWW Qauipsizdik keñesi Irannıñ ballistikalıq zımıran jasauına jäne oğan özge elderdiñ kömektesuine tıyım salğan bolatın.

“The Qazaq Times”