يراننىڭ جەرسەرىك تاسىمال زىمىرانى. فوتو: VOA.

اقش العاش رەت يراننىڭ عارىشتىق اگەنتتىگىن سانكتسيا تىزىمىنە ەنگىزدى. ۋاشينگتون يراندى زىمىران باعدارلامالارىن جاسىرىپ قالۋ ءۇشىن عارىشتىق باعدارلامانى پايدالانعان دەپ ايىپتاعان.

«قۇراما شتات يراننىڭ بالليستيكالىق زىمىران باعدارلامالارىن عارىشتىق ۇشىرۋ باعدارلامالارىمەن كولەگەيلەۋىنە جول بەرمەيدى دەدى»، – اقش-تىڭ مەم. حاتشىسى مايك پومپەو سەيسەنبى كۇنى جاساعان مالىمدەمەسىندە.

جاڭا سانكتسيا يراننىڭ عارىش اگەنتتىگى، عارىشتىق زەرتتەۋلەر ورتالىعى جانە اەروناۆتيكا ينستيتۋتى قاتارلى ورتالىقتارى مەن كاسىپورىندارىنا باعىتتالادى.  سانكتسيا تالابى بويىنشا قۇراما شتات وسى ورىنداردىڭ اكتيۆتەرىن بۇعاتتايدى جانە امەريكالىقتاردىڭ ولارمەن جۇمىس جۇرگىزۋىنە تىيىم سالادى.

اقش-تىڭ مالىمدەۋىنشە، يران عارىشقا ۇشىراتىن زىمىرانداردى بالليستيكالىق زىمىران تەحنيكاسىن پايدالانىپ جاسايدى نەمەسە سوعان وزگەرتەدى. ۇشىرۋ كەزىندەگى جانە ۇشۋ كۇيىندەگى زىمىراندى باسقارۋ ادىستەرى دە بالليستيكالىق زىمىرانداردى باسقارۋ ادىسىمەن بىردەي ەكەنىن العا تارتقان.

رەسمي ۋاشينگتون يراننىڭ بالليستيكالىق زىمىران باعدارلاماسى ءۇشىن حالىقارالىق عىلىمي قاۋىمداستىقتى دا سىنعا العان. مالىمەتكە قاراعاندا، حالىقارالىق عىلىمي قاۋىمداستىق پەن يراننىڭ عارىشتىق اپپاراتتار سالاسىنداعى ىنتىماقتاستىعى بالليستيكالىق زىمىران باعدارلاماسىن جۇزەگە اسىرۋىنا كومەكتەسەدى.

الايدا، يران وزىنە تاعىلعان ايىپتاردى جوققا شىعاردى، ءارى عارىشتىق باعدارلامالارىنىڭ ماقساتى بايلانىس جەرسەرىكتەرى (سپۋتنيك) ءۇشىن زىمىراندار جاساۋ ەكەنىن العا تارتتى.

يران 2013 جىلدان بەرى ەكى بىردەي بايلانىس جەرسەرىگىن وربيتاعا شىعارعان. الايدا، بيىلعى جىلعا جوسپارلانعان ءۇش رەتكى ۇشىرۋ ساتسىزدىككە ۇشىرادى. بۇدان ءبىراز بۇرىن ۇشىرۋ الاڭىندا ءبىر زىمىرانى جارىلىپ كەتتى.

بۇۇ قاۋىپسىزدىك كەڭەسى يراننىڭ بالليستيكالىق زىمىران جاساۋىنا جانە وعان وزگە ەلدەردىڭ كومەكتەسۋىنە تىيىم سالعان بولاتىن.

“The Qazaq Times”