BWW Gumanitarlıq mäseleler jönindegi bas hatşısı Stiven O'Brayenniñ 10 naurızda jasağan eskertuin osıdan bwrın da saytımızda jariyalağan edik. Qazirgi tañda älemniñ ekinşi dünie soğısınan bergi eñ naşar gumanitarlıq jağdayğa tap bolıp otırğanın belgili boldı. Qıtay Şinhua aqparattıq agenttiginiñ saytında bwl turalı bir qatar naqtı mälimetter jariyalandı. Yemen, Sudan, Somali jäne Nigeriya qatarlı tört eldiñ özinde 20 millionnan astam adamnıñ aşarşılıq pen joqşılıqtan ömir sürudiñ asa qiın jağdayında qaldı. 

Stiven O'Brayenniñ  (Stephen O'Brien) sözine qarağanda, qazir älem Birlesken Wlttar Wyımı Qwrılğannan bergi (1945) eñ naşar gumanitarlıq jağdayğa tap bolıp otır eken. Joğarıda atalğan tört eldiñ işinde Yemenniñ jağdayı eñ auır – soğıs qaqtığıstarı eldegi halıq sanınıñ üşten eki bölegin, yağni, 18,8 mln adamdı şwğıl gumanitarlıq kömekke mwqtaj etken. Sonıñ işinde 7 mln adam aşarşılıq körude. Bwl körsetkiş osı jıldıñ qañtar ayında 3 mln adamdı körsetken bolatın. Aştıqqa wşırağandar sanınıñ şwğıl artuı eldiñ gumanitarlıq jağdayın şeşilui qiın kürdeli deñgeyge jetkizgen.

BWW Gumanitarlıq ister komitetiniñ bergen mälimetine süyensek, äleumettik jağdayı tömen elderdiñ eñdiginde Yemennen keyin Oñtüstik Sudan twr. Bwl elde de 7,5 mln-nan astam adam şwğıl kömekke zäru. Sonıñ arasında bir millionğa juıq balalar aşarşılıq qasiretin bastan keşude.  Al şwğıl kömekke mwqtaj Solmaidağı twrğındardıñ sanı, eldiñ jalpı halıq sanınıñ teñ jartısınan asadı. Nigeriyanıñ soltüstik şığısın da jappay aşarşılıq jaylap, ay sayın mıñdağan balalar köz jwmuda. Eresek adamdar da aştıq pen auıru azabınan ölude.

Gumanitarlıq ister komiteti osı elderge äleumettik kömek körsetu, qarjılay qoldau bildiruge älem elderin ıntalandıru isin qolğa aldı. Stiven O'Brayenniñ bwl turalı: « Şındığına keler bolsaq, bwl mäseleni şeşu üşin 7 aydıq aldında-aq 4,4 mlrd AQŞ dollarına zäru edik. Al, qazirgi jağdayda bwl qarjınıñ özi de jetkiliksiz. Halıqaralıq qauımdastıqtıñ küş-jigerin, maqsat-tilegin birlikke keltirmesek, atalğan elderdegi halıq tügelimen aştan qırılıp qaladı», – dedi.

BWW körsetken mälimette, atalğan aumaqtağı 5 jasqa tolmağan balalardıñ 30 payızı toyıp tamaq jey almay otır. 20 payız otbası asa auır azıq tülik tapşılığına tap bolğan. 10 mıñ adamnan künine 2 adam aştıq sebebinen köz jwmuda.

“The Qazaq Times”