Soltüstik Koreya basşısı zımıran sınağı kezinde. Foto: VOA.

Soltüstik Koreya ükimeti särsenbi küni eldegi resmi aqparat qwraldarı arqılı mälimdeme taratıp, AQŞ-tı Oñtüstik Koreya jerinde jaña orta qaşıqtıqtağı zımırandardı ornatuğa äreket etip otır dep bildirdi. KHDR tarabı AQŞ-tıñ bwl äreketin "jaña suıq soğıstıñ bastaluın" bildiredi jäne aymaqtağı qarulı qaqtığıs qaupin küşeytedi dep qaraydı. 

Esteriñizde bolsa, AQŞ Qorğanıs ministrligi tamızdıñ bas şeninde, orta qaşıqtıqtağı zımırandardı Aziyağa ornalastıru turalı şeşimdi jaqtap, mälimdeme taratqan edi. Bwğan deyin Qwrama Ştat tarabı Reseymen qol qoyğan orta-jaqın qaşıqtıqtağı zımırandar turalı şarttan bas tartqan bolatın.

"AQŞ Aziya elderinde qwrlıqtan atılatın orta qaşıqtıqtağı zımırandardı ornatuğa äreket etude. Olardıñ közdep otırğan eli – Oñtüstik Koreya", – dep mälimdegen Soltüstik Koreyanıñ resmi basılımdarı. Sonday-aq: "Oñtüstik Koreyada jaña qarulardıñ ornalasuı Qiır Şığısta "Jaña Suıq soğıs" qaupin küşeytip, öñirde qaru-jaraq jasau jarısın örşitedi", – dep bağalağan.

Al, Oñtüstik Koreya qorğanıs lauazımdıları Koreya men AQŞ arasında mwnday mäsele turalı talqılaulardıñ bolmağanın ayttı. AQŞ-tıñ köptegen lauazımdıları orta qaşıqtıqtağı zımırandardı ornalastıru operaciyalarınıñ wzaq jılğa jalğasatının alğa tartuda.

Alayda, Soltüstik Koreyanıñ kezekti mälimdemesi Korey tübegi qayşılığınıñ qaytadan kürdelilene tüskenin añğarttı. Pioñyañ tarabı Seuldiñ amerikalıq "Sad" zımıran qorğanıs jüyesin jetildiru turalı äreketterin de sınğa aldı. Qorğanıs jüyesi Oñtüstik Koreyanı qorğaudan bwrın, oğan eselengen qaterlerdi alıp keledi dep eskertu jasağan.

Soñğı kezderi Soltüstik Koreya AQŞ-tıñ keybir äreketterine jäne AQŞ-Oñtüstik Koreya birlesken äskeri oqu-jattığularına qarsı narazılıq retinde zımıran sınaqtarın ötkizgen bolatın. Bir mezgil kelissözge qaray wmtılğan Soltüstik Koreya, Korey tübegi taqırıptarı soñğı kezderi qaytadan qarsılıq pen qayşılıqqa qaray bet bwrıp baradı.

“The Qazaq Times”