سولتۇستىك كورەيا باسشىسى زىمىران سىناعى كەزىندە. فوتو: VOA.

سولتۇستىك كورەيا ۇكىمەتى سارسەنبى كۇنى ەلدەگى رەسمي اقپارات قۇرالدارى ارقىلى مالىمدەمە تاراتىپ، اقش-تى وڭتۇستىك كورەيا جەرىندە جاڭا ورتا قاشىقتىقتاعى زىمىرانداردى ورناتۋعا ارەكەت ەتىپ وتىر دەپ ءبىلدىردى. كحدر تارابى اقش-تىڭ بۇل ارەكەتىن "جاڭا سۋىق سوعىستىڭ باستالۋىن" بىلدىرەدى جانە ايماقتاعى قارۋلى قاقتىعىس قاۋپىن كۇشەيتەدى دەپ قارايدى. 

ەستەرىڭىزدە بولسا، اقش قورعانىس مينيسترلىگى تامىزدىڭ باس شەنىندە، ورتا قاشىقتىقتاعى زىمىرانداردى ازياعا ورنالاستىرۋ تۋرالى شەشىمدى جاقتاپ، مالىمدەمە تاراتقان ەدى. بۇعان دەيىن قۇراما شتات تارابى رەسەيمەن قول قويعان ورتا-جاقىن قاشىقتىقتاعى زىمىراندار تۋرالى شارتتان باس تارتقان بولاتىن.

"اقش ازيا ەلدەرىندە قۇرلىقتان اتىلاتىن ورتا قاشىقتىقتاعى زىمىرانداردى ورناتۋعا ارەكەت ەتۋدە. ولاردىڭ كوزدەپ وتىرعان ەلى – وڭتۇستىك كورەيا", – دەپ مالىمدەگەن سولتۇستىك كورەيانىڭ رەسمي باسىلىمدارى. سونداي-اق: "وڭتۇستىك كورەيادا جاڭا قارۋلاردىڭ ورنالاسۋى قيىر شىعىستا "جاڭا سۋىق سوعىس" قاۋپىن كۇشەيتىپ، وڭىردە قارۋ-جاراق جاساۋ جارىسىن ورشىتەدى", – دەپ باعالاعان.

ال، وڭتۇستىك كورەيا قورعانىس لاۋازىمدىلارى كورەيا مەن اقش اراسىندا مۇنداي ماسەلە تۋرالى تالقىلاۋلاردىڭ بولماعانىن ايتتى. اقش-تىڭ كوپتەگەن لاۋازىمدىلارى ورتا قاشىقتىقتاعى زىمىرانداردى ورنالاستىرۋ وپەراتسيالارىنىڭ ۇزاق جىلعا جالعاساتىنىن العا تارتۋدا.

الايدا، سولتۇستىك كورەيانىڭ كەزەكتى مالىمدەمەسى كورەي تۇبەگى قايشىلىعىنىڭ قايتادان كۇردەلىلەنە تۇسكەنىن اڭعارتتى. پيوڭياڭ تارابى سەۋلدىڭ امەريكالىق "ساد" زىمىران قورعانىس جۇيەسىن جەتىلدىرۋ تۋرالى ارەكەتتەرىن دە سىنعا الدى. قورعانىس جۇيەسى وڭتۇستىك كورەيانى قورعاۋدان بۇرىن، وعان ەسەلەنگەن قاتەرلەردى الىپ كەلەدى دەپ ەسكەرتۋ جاساعان.

سوڭعى كەزدەرى سولتۇستىك كورەيا اقش-تىڭ كەيبىر ارەكەتتەرىنە جانە اقش-وڭتۇستىك كورەيا بىرلەسكەن اسكەري وقۋ-جاتتىعۋلارىنا قارسى نارازىلىق رەتىندە زىمىران سىناقتارىن وتكىزگەن بولاتىن. ءبىر مەزگىل كەلىسسوزگە قاراي ۇمتىلعان سولتۇستىك كورەيا، كورەي تۇبەگى تاقىرىپتارى سوڭعى كەزدەرى قايتادان قارسىلىق پەن قايشىلىققا قاراي بەت بۇرىپ بارادى.

“The Qazaq Times”