Foto: nazarnews.kg

Qırğızstan küş qwrılımdarı eks-prezident Almazbek Atambaevtıñ Qoy-tas auılındağı rezidenciyasına qayta basa köktep kirgen. Bwl turalı BBC agenttiginiñ Özbek qızmeti habarladı.

8 tamız sağat 16:30-dar şamasında Almazbek Atambaev jağındağı 400-ge tarta qoldauşıları qwqıq organdarı ökilderine tas-tayaqtar men benzin qwyılğan bötelkeler atqılau arqılı qarsılıq körsetken. Atambaevqa tiesili «Aprel'» telearnasınıñ mälimetine qarağanda, arnayı operaciyağa mıñdağan sarbaz qatısqan. Sonımen qatar arnayı qarulı jasaq kölikteri Qoy-tastıq rezidenciyanıñ qaqpasına soğılıp, jalın twtanğan.

Sputnik Qırğızstan aqparattıq agenttiginiñ habarlauınşa, qaqtığıstan soñ qwqıq qorğau organdarı ökilderi Almazbek Atambaevtı twtqındağan.

Al, qazirgi prezident Sooronbay Jeenbekov Qauipsizdik keñesiniñ  jiınında oqiğağa qatıstı kinäliler jauapqa tartılatının mälimdedi:

«Aytılğan faktiler boyınşa qılmıstıq is qozğaldı. Ayıptılar sözsiz jauapqa tartıladı. Keşege deyin Atambaev tergeuge kuäger esebinde şaqırılıp kelse, endi ol auır qılmısqa küdikti retinde şaqırılatın boladı».

Bassızdıqtı tıyu üşin memlekettiñ küşi men sayasi erki jetkilikti ekendigin aytqan prezident «Bwl eki adamnıñ teketiresi emes, jemqorlıqtıñ şegi bolğan barlıq qılmıstıq isterdi aşuğa, tergeudiñ zañ ayasında taza jüruine, sot procesteriniñ ädildigin qamtamasız etuine qarsı jasalıp jatqan küres» dedi.

Bügingi Qırğız eliniñ jaña ükimeti Atambaevtı korrupciya deregi jäne qılmıstıq top serkesi Aziz Batukaevtıñ zañsız bosatıluı, öz ökilettiligin asıra paydalanu äereketi boyınşa ayıptauda. Degenmen bası küdikke ilikken bwrınğı prezident bwl ayıptaulardı negizsiz dep biledi, kelispeydi. Osı uaqıtqa deyin 3 ret tergeuge şaqırtılğan eks-prezidenttiñ üyine 7 tamız arnayı jasaq sarbazdarı basıp kirip, wstamaq bolğan. Alayda soñı qaqtığısqa wlasqan operaciyada 1 jauınger köz jwmıp, 45 beybit twrğın jaralanğan edi.

Qoy-Tas eldi mekeninde eks-prezident A.Atambaevtıñ rezidenciyası ornalasqan. 8 tamız 2019 jıl. Qırğızstan. Foto: BBC Uzbek qızmeti

8 tamız qwqıq qorğau organdarınıñ ekinşi ret Qoy-Tasqa operaciya barısımen baruı. 8 tamız 2019 jıl. Qırğızstan. Foto: sputnik.kg

"The Qazaq Times"