Foto: The Times

Qasım-Jomart Toqaev Boris Djonsondı Wlıbritaniya Birikken Korol'diginiñ jäne Soltüstik Irlandiyanıñ prem'er-Ministri lauazımına saylanuımen qwttıqtadı.

Aqordanıñ baspasöz qızmetiniñ habarlauınşa, jedelhatta: «Basqaruşı Tori partiyasınıñ köşbasşısın saylaudağı sizdiñ ayqın jeñisiñiz Wlıbritaniyanıñ igiligi jolında qol jetkizgen tañqalarlıq tabıstarıñızdıñ jäne adal qızmetiñizdiñ moyındaluın körsetedi», – delingen.

Sonımen qatar, memleket basşısı Qazaqstan men Wlıbritaniyanıñ strategiyalıq seriktestik, diplomatiyalıq qarım-qatınasına toqtalıp ötken. Ekijaqtı ıntımaqtastıqtı odan äri nığaytuğa jäne jaña investiciyalıq mümkindikterdiñ aşıluına senim bildirgen Qasım-Jomart Toqaev Boris Djonsonğa jaña qızmette tabıs, sonday-aq, britan halqına baq-bereke tiledi.

24 şildede Konservatorlar partiyasınıñ jaña basşısına dauıs beru qorıtındısı boyınşa Djonson 92 153 dauıs, al onıñ qarsılası – qazirgi Sırtqı ister ministri Djeremi Hant 46 656 dauıs jinağan. Osığan deyin memleket SİM-niñ basşısı jäne London meri bolğan Boris Djonson Birikken Korol'diktiñ 77-şi prem'er-ministri atandı. Saylau nätijesi belgili bolğannan keyin Londonda jüzdegen adam Boris Djonsonnıñ eldiñ jaña prem'er-ministri bolıp tağayındaluına qarsı narazılıq akciyasın wyımdastırğan.

"The Qazaq Times"