Äskeri qızmetkerler Arıs qalasındağı 16 köşeden 70 jarılıp ülgermegen snaryadtı taptı.

Bwl turalı öziniñ feysbuktegi paraqşasında Türkistan oblısı äkiminiñ keñesşisi Säken Qalqamanov habarladı. Onıñ aytuınşa, äskeri jaraqtıñ deni üylerden tabılğan. Sol sebepti qazir twrğındarğa qalağa kelu öte qauipti deydi ol.

24 mausımda Arıs qalasındağı äskeri qoymalardıñ birinde jarılıs bolğan. Saldarınan eki adam qaza tauıp, 165 adam medicinalıq kömekke jügindi. Qazirgi uaqıtta Arıstağı äskeri bölimşe aumağındağı oq-däri qoymasında jarılıstar tıyıldı. Qorğanıs  ministrligi Arıs qalasınıñ aumağın jarılmay qalğan oq-därilerden tazartu üşin arnayı saperler tobın qwrğan. İşki ister ministriniñ orınbasarı Arıstağı jarılıstıñ qaytalanu qaupi bar degen bolatın. Vice-ministr: «Qazirgi uaqıtta Qorğanıs ministrligi wşqışsız basqarılatın wşu apparatınıñ kömegimen aerovizualdı wşuları jürgizdi. Oq-däri saqtalatın qoymalardıñ aumağında bıqsığan ottıñ 9 oşağı tabıldı. YAğni, äzirşe qaytadan jarılıstardıñ orın alu qaupi saqtaluda.  Degenmen, bastapqı uaqıtta orın alğan jarılıstarday jarılıs bolmaydı dep oylaymın», – dedi.

"The Qazaq Times"