Foto: www.bbc.com

Jurnalist Jamal Haşoggidiñ ölimine Saud Arabiyasınıñ mwrager hanzadasınıñ qatısı bar. BWW tergeu tobın basqarğan An'es Kallamar osılay dep mälimdedi.

Tergeuşiniñ aytuınşa, jurnalist qasaqana öltirilgen. Halıqaralıq wyım adam qwqığı taptalğan bwl jağdayğa qatıstı Saud Arabiyasın jazalaudı wsındı. Äzirge resmi Er-Riyad bwl ayıpqa jauap qatqan joq. Biraz uaqıtqa sozılğan tergeu jwmıstarına advokattar, kriminalister de qatısqan. Jüz betten twratın esep jartı jıl boyı jiti zerttelip, dayındaldı.

Qañtarda AQŞ memlekettik hatşısı Mayk Pompeo Katar Sırtqı ister ministri äl-Tanimen kezdesip, Qwrama Ştat Saud Arabiyasınıñ taq mwrager hanzadası Mwhammed bin-Salmannan jurnalis Haşoggidiñ ölimine qatıstı küdiktilerdiñ jazalanuına kepildik berudi talap etip otırğanın aytqan. Mayk Pompeo sözinde: «Biz jurnalist Haşoggidiñ isine qatıstı küdiktilerdiñ jazağa tartıluı mäselesi boyınşa mwrager hanzada bin-Salmanmen söylesudi jalğastıratın bolamız. Bwl qastandıqtı qabılday almaymız, Haşoggi isi swraqsız qalmaydı», – degen bolatın.

Esteriñizde bolsa, bıltır qazanda Saud Arabiyasınıñ taq mwrageri Mwhammed bin-Salmandı köbirek sınğa alğan jurnalist Haşoggi Saud Arabiyasınıñ Stambuldağı konsuldığında qastandıqqa wşırağan bolatın. Türkiya biligi eñ aldımen Haşoggi isine baylanıstı Saud biligin ayıptap, tergeu talap etti. Türkiya tarabınıñ mälimetterinen jäne AQŞ-tıñ Ortalıq Barlau Agenttiginiñ (CIA) tergeu qorıtındısı boyınşa mwrager hanzadanıñ atalğan qastandıq isine qatısı bar degen boljam aytılğan. Alayda, bwl ayıptaular hanzada Mwhammed bin-Salman jağınan teristelip kelgen.

"The Qazaq Times"