فوتو: www.bbc.com

جۋرناليست جامال حاشوگگيدىڭ ولىمىنە ساۋد ارابياسىنىڭ مۇراگەر حانزاداسىنىڭ قاتىسى بار. بۇۇ تەرگەۋ توبىن باسقارعان انەس كاللامار وسىلاي دەپ مالىمدەدى.

تەرگەۋشىنىڭ ايتۋىنشا، جۋرناليست قاساقانا ولتىرىلگەن. حالىقارالىق ۇيىم ادام قۇقىعى تاپتالعان بۇل جاعدايعا قاتىستى ساۋد ارابياسىن جازالاۋدى ۇسىندى. ازىرگە رەسمي ەر-رياد بۇل ايىپقا جاۋاپ قاتقان جوق. ءبىراز ۋاقىتقا سوزىلعان تەرگەۋ جۇمىستارىنا ادۆوكاتتار، كريميناليستەر دە قاتىسقان. ءجۇز بەتتەن تۇراتىن ەسەپ جارتى جىل بويى ءجىتى زەرتتەلىپ، دايىندالدى.

قاڭتاردا اقش مەملەكەتتىك حاتشىسى مايك پومپەو كاتار سىرتقى ىستەر ءمينيسترى ءال-تانيمەن كەزدەسىپ، قۇراما شتات ساۋد ارابياسىنىڭ تاق مۇراگەر حانزاداسى مۇحاممەد بين-سالماننان جۋرناليس حاشوگگيدىڭ ولىمىنە قاتىستى كۇدىكتىلەردىڭ جازالانۋىنا كەپىلدىك بەرۋدى تالاپ ەتىپ وتىرعانىن ايتقان. مايك پومپەو سوزىندە: «ءبىز جۋرناليست حاشوگگيدىڭ ىسىنە قاتىستى كۇدىكتىلەردىڭ جازاعا تارتىلۋى ماسەلەسى بويىنشا مۇراگەر حانزادا بين-سالمانمەن سويلەسۋدى جالعاستىراتىن بولامىز. بۇل قاستاندىقتى قابىلداي المايمىز، حاشوگگي ءىسى سۇراقسىز قالمايدى»، – دەگەن بولاتىن.

ەستەرىڭىزدە بولسا، بىلتىر قازاندا ساۋد ارابياسىنىڭ تاق مۇراگەرى مۇحاممەد بين-سالماندى كوبىرەك سىنعا العان جۋرناليست حاشوگگي ساۋد ارابياسىنىڭ ستامبۋلداعى كونسۋلدىعىندا قاستاندىققا ۇشىراعان بولاتىن. تۇركيا بيلىگى ەڭ الدىمەن حاشوگگي ىسىنە بايلانىستى ساۋد بيلىگىن ايىپتاپ، تەرگەۋ تالاپ ەتتى. تۇركيا تارابىنىڭ مالىمەتتەرىنەن جانە اقش-تىڭ ورتالىق بارلاۋ اگەنتتىگىنىڭ (CIA) تەرگەۋ قورىتىندىسى بويىنشا مۇراگەر حانزادانىڭ اتالعان قاستاندىق ىسىنە قاتىسى بار دەگەن بولجام ايتىلعان. الايدا، بۇل ايىپتاۋلار حانزادا مۇحاممەد بين-سالمان جاعىنان تەرىستەلىپ كەلگەن.

"The Qazaq Times"