Ukrainalıq jurnalist Dmitriy Gordon Almatıda ötken XVI Euraziyalıq media forumda Ukraina men Resey qarım-qatınası, Donbastağı jağday jäne özge de sayasi taqırıptar jöninde pikir bildirdi.

«Blogerler: virtualdı älemniñ rok jwldızdarı ma?» taqırıbında ötken konferenciyada reseylik jurnalist Maksim Şevçenko men ukrainalıq jurnalist Dmitriy Gordon eki el arasında bwrınnan kele jatqan qaqtığıstarğa qatıstı aşıq oy aytıp, talqılaudıñ artı pikir qayşılığına wlastı.

Gordon sözinde: «Ukraina jerine birinşi kelip, qaqtığıs jasağan Resey, Ukraina emes. Reseylikter özderiniñ bwqaralıq aqparat qwraldarı arqılı aşıq aqparattıq soğıs wyımdastırıp otır jäne sol arqılı halqınıñ oyın ulap keledi. Eki el arasındağı şielenisti Poroşenko da, jañadan saylanğan Zelenskiy de şeşe almaydı. Soğıstı bastağan Putin, ayaqtaytın da Putin. Ukraina men Resey soğısındağı beybitşiliktiñ kilti Putinde. Sol sebepti, körşiles elder, ukrainder üşin dos-bauır sanalatın belarus', qazaq halqı, saq bolıñızdar. Putin sizderge de Ukrainadağı jağdaydı tuğızuı äbden mümkin», – dedi.

Gordonnıñ bwl pikirinen keyin Şevçenko: «Men üşin Zelenskiy – bügingi qorqınıştı soğıstı toqtata alatın birden-bir adam. Ärine, ärkim öz oyın aşıq aytuğa mindetti. Donbastağı jağday kezinde ukrainalıqtardıñ bir-birin öltirip, öz-özderine qarsı şıqqanın kördim. Al Qazaqstanğa keler bolsaq, däl osı memleket Mäskeu men Kiev baylanısında beytarap közqaras wstanıp otırğan el. Qazaqstan – beybitşiliktiñ alañı desem artıq bolmaydı», – dedi. Artınşa söz alğan Gordon Donbasta soğıstı bastağan Resey äskerileri ekenin jäne qazirgi uaqıtta eki el aşıq soğıs alañında ekendigin ayttı.

Reseylik jurnalist Maksim Şevçenko. Foto: http://eamedia.org

Talqılaudıñ soñında jurnalister Qazaqstan tarapınıñ Resey –Ukraina azamattarınıñ betpe-bet kezdesip, aşıq oy talqı ötkizui üşin mümkindik bergenine alğıs bildirdi. Şevçenkonıñ aytuınşa, mwnday mümkindik basqa uaqıtta bolmaydı.

Jalpı alğanda, 2002 jıldan beri halıqaralıq deñgeyde ötkizilip kele jatqan Euraziyalıq media forumğa biıl əlemniñ 60 memleketinen 500-den astam delegat jinalğan. Forumnıñ alğaşqı küni cifrlıq jurnalistika tendenciyaları, al ekinşi küni jasandı intellekt, de-globalizaciya, media jañaşıldıq taqırıbında ötti. Al üşinşi küni ğalamdıq küş teñgerimi, blogerler men jurnalister, AQŞ pen Qıtay sauda soğısı, Europalıq Odaq pen Wlıbritaniyanıñ Brexit kelisimi turalı örbidi. Degenmen, blogerler taqırıbında ötui tiis konferenciya reseylik jurnalist Şevçenko men ukrainalıq tilşi Gordonnıñ ekeuara pikirtalasına wlastı.

Gordonnıñ pikirinen wqqanımızday, Qırım, Donbass, Kerş bwğazı jäne özge de iri şielenisterdi qoldan jasağan Resey tarapı, sol sebepti Kiev Mäskeu wstanğan agressiyalıq sayasattıñ kezekti märte qwrbanına aynalmauı üşin Europalıq Odaq, AQŞ sındı alpauıttar jağına ötpek. Ukrainanıñ jañadan saylanğan prezidenti Vladimir Zelenskiy 20 mamırda EO jäne AQŞ sayasatkerlerimen kezdesip, Reseyge qarsı qatañ qaulılardı (sankciya) wlğaytu turalı ötiniş bildirdi. Demek, jaqın arada Ukraina men Resey baylanısınıñ bir arnağa toğısuı ekitalay...

"The Qazaq Times"