دميتري گوردون: بەيبىتشىلىكتىڭ كىلتى ءپۋتيننىڭ قالتاسىندا

ۋكراينالىق جۋرناليست دميتري گوردون الماتىدا وتكەن XVI ەۋرازيالىق مەديا فورۋمدا ۋكراينا مەن رەسەي قارىم-قاتىناسى، دونباستاعى جاعداي جانە وزگە دە ساياسي تاقىرىپتار جونىندە پىكىر ءبىلدىردى.

«بلوگەرلەر: ۆيرتۋالدى الەمنىڭ روك جۇلدىزدارى ما؟» تاقىرىبىندا وتكەن كونفەرەنتسيادا رەسەيلىك جۋرناليست ماكسيم شەۆچەنكو مەن ۋكراينالىق جۋرناليست دميتري گوردون ەكى ەل اراسىندا بۇرىننان كەلە جاتقان قاقتىعىستارعا قاتىستى اشىق وي ايتىپ، تالقىلاۋدىڭ ارتى پىكىر قايشىلىعىنا ۇلاستى.

گوردون سوزىندە: «ۋكراينا جەرىنە ءبىرىنشى كەلىپ، قاقتىعىس جاساعان رەسەي، ۋكراينا ەمەس. رەسەيلىكتەر وزدەرىنىڭ بۇقارالىق اقپارات قۇرالدارى ارقىلى اشىق اقپاراتتىق سوعىس ۇيىمداستىرىپ وتىر جانە سول ارقىلى حالقىنىڭ ويىن ۋلاپ كەلەدى. ەكى ەل اراسىنداعى شيەلەنىستى پوروشەنكو دا، جاڭادان سايلانعان زەلەنسكي دە شەشە المايدى. سوعىستى باستاعان پۋتين، اياقتايتىن دا پۋتين. ۋكراينا مەن رەسەي سوعىسىنداعى بەيبىتشىلىكتىڭ كىلتى پۋتيندە. سول سەبەپتى، كورشىلەس ەلدەر، ۋكرايندەر ءۇشىن دوس-باۋىر سانالاتىن بەلارۋس، قازاق حالقى، ساق بولىڭىزدار. پۋتين سىزدەرگە دە ۋكرايناداعى جاعدايدى تۋعىزۋى ابدەن مۇمكىن»، – دەدى.

گوردوننىڭ بۇل پىكىرىنەن كەيىن شەۆچەنكو: «مەن ءۇشىن زەلەنسكي – بۇگىنگى قورقىنىشتى سوعىستى توقتاتا الاتىن بىردەن-ءبىر ادام. ارينە، اركىم ءوز ويىن اشىق ايتۋعا مىندەتتى. دونباستاعى جاعداي كەزىندە ۋكراينالىقتاردىڭ ءبىر-ءبىرىن ءولتىرىپ، ءوز-وزدەرىنە قارسى شىققانىن كوردىم. ال قازاقستانعا كەلەر بولساق، ءدال وسى مەملەكەت ماسكەۋ مەن كيەۆ بايلانىسىندا بەيتاراپ كوزقاراس ۇستانىپ وتىرعان ەل. قازاقستان – بەيبىتشىلىكتىڭ الاڭى دەسەم ارتىق بولمايدى»، – دەدى. ارتىنشا ءسوز العان گوردون دونباستا سوعىستى باستاعان رەسەي اسكەريلەرى ەكەنىن جانە قازىرگى ۋاقىتتا ەكى ەل اشىق سوعىس الاڭىندا ەكەندىگىن ايتتى.

رەسەيلىك جۋرناليست ماكسيم شەۆچەنكو. فوتو: http://eamedia.org

تالقىلاۋدىڭ سوڭىندا جۋرناليستەر قازاقستان تاراپىنىڭ رەسەي –ۋكراينا ازاماتتارىنىڭ بەتپە-بەت كەزدەسىپ، اشىق وي تالقى وتكىزۋى ءۇشىن مۇمكىندىك بەرگەنىنە العىس ءبىلدىردى. شەۆچەنكونىڭ ايتۋىنشا، مۇنداي مۇمكىندىك باسقا ۋاقىتتا بولمايدى.

جالپى العاندا، 2002 جىلدان بەرى حالىقارالىق دەڭگەيدە وتكىزىلىپ كەلە جاتقان ەۋرازيالىق مەديا فورۋمعا بيىل əلەمنىڭ 60 مەملەكەتىنەن 500-دەن استام دەلەگات جينالعان. فورۋمنىڭ العاشقى كۇنى تسيفرلىق جۋرناليستيكا تەندەنتسيالارى، ال ەكىنشى كۇنى جاساندى ينتەللەكت، دە-گلوباليزاتسيا، مەديا جاڭاشىلدىق تاقىرىبىندا ءوتتى. ال ءۇشىنشى كۇنى عالامدىق كۇش تەڭگەرىمى، بلوگەرلەر مەن جۋرناليستەر، اقش پەن قىتاي ساۋدا سوعىسى، ەۋروپالىق وداق پەن ۇلىبريتانيانىڭ Brexit كەلىسىمى تۋرالى ءوربىدى. دەگەنمەن، بلوگەرلەر تاقىرىبىندا ءوتۋى ءتيىس كونفەرەنتسيا رەسەيلىك جۋرناليست شەۆچەنكو مەن ۋكراينالىق ءتىلشى گوردوننىڭ ەكەۋارا پىكىرتالاسىنا ۇلاستى.

گوردوننىڭ پىكىرىنەن ۇققانىمىزداي، قىرىم، دونباسس، كەرش بۇعازى جانە وزگە دە ءىرى شيەلەنىستەردى قولدان جاساعان رەسەي تاراپى، سول سەبەپتى كيەۆ ماسكەۋ ۇستانعان اگرەسسيالىق ساياساتتىڭ كەزەكتى مارتە قۇربانىنا اينالماۋى ءۇشىن ەۋروپالىق وداق، اقش سىندى الپاۋىتتار جاعىنا وتپەك. ۋكراينانىڭ جاڭادان سايلانعان پرەزيدەنتى ۆلاديمير زەلەنسكي 20 مامىردا ەو جانە اقش ساياساتكەرلەرىمەن كەزدەسىپ، رەسەيگە قارسى قاتاڭ قاۋلىلاردى (سانكتسيا) ۇلعايتۋ تۋرالى ءوتىنىش ءبىلدىردى. دەمەك، جاقىن ارادا ۋكراينا مەن رەسەي بايلانىسىنىڭ ءبىر ارناعا توعىسۋى ەكىتالاي...

"The Qazaq Times"