Almatıda XVI Euraziyalıq media forumnıñ ekinşi küni bastaldı.

Jiınnıñ alğaşqı küni şeteldik media-sarapşılardıñ taqırıptıq şeberlik däristerimen bastalsa, ekinşi kezeñ halıqaralıq özekti mäselelerdi talqılau maqsatında auqımdı konferenciyağa wlastı.

«Bügingi älem: şınayılıq transformaciyası ma?» taqırıbına arnalğan mediaforum ayasında ötken alğaşqı şeberlik sabağı ekologiyalıq jurnalistikağa arnaldı. Däriste ekologiya mäselesin jazğanda derek közderiniñ dwrıs tañdaluı, jahandanu kezeñindegi bastı mäsele, ekologiya men ekonomika mañızdılığı jaylı aytıldı. Osı taqırıpta söz qozğağan franciyalıq jurnalist, Reuters agenttiginiñ tilşisi Nel'son Greyvz: "Biz bügin klimattıñ özgeru mäselesine basımdıq berdik. Bwl taqırıp Europada da, Batısta da jii talqılanadı. Alayda bügin men sizderdiñ elderiñizde de auağa las qaldıqtar jiberiletinin estidim. Iya ras, qalalar damıp jatır, öndiris ösude, avtokölikter kömirqışqıl gazın bölip jatır auağa. Eger aqparat qwraldarı bwl problemanı jii köterse, ğalamdıq mamandar nazar audaratını sözsiz. Olar klimattı saqtaudıñ joldarın izdeydi. Eñ bastısı aqparattı bere bilu kerek", - deydi.

Cifrlıq jurnalistika taqırıbında söz qozğağan avstraliyalıq jurnalist Ivo Burum: " Şınayı qarım-qatınas öte mañızdı. Ärine, robototehnika ömirimizge enip keledi. Biraq biz onı tiimdi qoldana biluimiz kerek. Jurnalistiñ, diktordıñ aqparat jetkizuşi ekenin eskersek, mwnda robot emes, naqtı mamannıñ röli mañızdı", - degen pikir bildirdi.

Sonımen qatar, wlıbritaniyalıq frilans-jurnalist Djenni Kliman mediakeñistik, cifrlıq jüyeniñ keleşegi turalı, al reseylik kinoprodyuser Sergey Bodrov kino salasındağı jañaşıldıq jaylı däris oqıdı.

Biıl halıqaralıq geosayasi, ekonomikalıq, äleumettik-mädeni damu mäseleleri talqığa tüsetin forumda 43 elden kelgen 500-ge juıq sarapşı bas qostı. Forumnıñ ekinşi küni jasandı intellekt, de-globalizaciya, media jañaşıldıq taqırıbında jalğastı.

 

"The Qazaq Times"