الماتىدا XVI ەۋرازيالىق مەديا فورۋمنىڭ ەكىنشى كۇنى باستالدى.

جيىننىڭ العاشقى كۇنى شەتەلدىك مەديا-ساراپشىلاردىڭ تاقىرىپتىق شەبەرلىك دارىستەرىمەن باستالسا، ەكىنشى كەزەڭ حالىقارالىق وزەكتى ماسەلەلەردى تالقىلاۋ ماقساتىندا اۋقىمدى كونفەرەنتسياعا ۇلاستى.

«بۇگىنگى الەم: شىنايىلىق ترانسفورماتسياسى ما؟» تاقىرىبىنا ارنالعان مەديافورۋم اياسىندا وتكەن العاشقى شەبەرلىك ساباعى ەكولوگيالىق جۋرناليستيكاعا ارنالدى. دارىستە ەكولوگيا ماسەلەسىن جازعاندا دەرەك كوزدەرىنىڭ دۇرىس تاڭدالۋى، جاھاندانۋ كەزەڭىندەگى باستى ماسەلە، ەكولوگيا مەن ەكونوميكا ماڭىزدىلىعى جايلى ايتىلدى. وسى تاقىرىپتا ءسوز قوزعاعان فرانتسيالىق جۋرناليست، Reuters اگەنتتىگىنىڭ ءتىلشىسى نەلسون گرەيۆز: ء"بىز بۇگىن كليماتتىڭ وزگەرۋ ماسەلەسىنە باسىمدىق بەردىك. بۇل تاقىرىپ ەۋروپادا دا، باتىستا دا ءجيى تالقىلانادى. الايدا بۇگىن مەن سىزدەردىڭ ەلدەرىڭىزدە دە اۋاعا لاس قالدىقتار جىبەرىلەتىنىن ەستىدىم. يا راس، قالالار دامىپ جاتىر، ءوندىرىس وسۋدە، اۆتوكولىكتەر كومىرقىشقىل گازىن ءبولىپ جاتىر اۋاعا. ەگەر اقپارات قۇرالدارى بۇل پروبلەمانى ءجيى كوتەرسە، عالامدىق ماماندار نازار اۋداراتىنى ءسوزسىز. ولار كليماتتى ساقتاۋدىڭ جولدارىن ىزدەيدى. ەڭ باستىسى اقپاراتتى بەرە ءبىلۋ كەرەك", - دەيدى.

تسيفرلىق جۋرناليستيكا تاقىرىبىندا ءسوز قوزعاعان اۆستراليالىق جۋرناليست يۆو بۋرۋم: " شىنايى قارىم-قاتىناس وتە ماڭىزدى. ارينە، روبوتوتەحنيكا ومىرىمىزگە ەنىپ كەلەدى. بىراق ءبىز ونى ءتيىمدى قولدانا ءبىلۋىمىز كەرەك. ءجۋرناليستىڭ، ديكتوردىڭ اقپارات جەتكىزۋشى ەكەنىن ەسكەرسەك، مۇندا روبوت ەمەس، ناقتى ماماننىڭ ءرولى ماڭىزدى", - دەگەن پىكىر ءبىلدىردى.

سونىمەن قاتار، ۇلىبريتانيالىق فريلانس-جۋرناليست دجەنني كليمان مەدياكەڭىستىك، تسيفرلىق جۇيەنىڭ كەلەشەگى تۋرالى، ال رەسەيلىك كينوپروديۋسەر سەرگەي بودروۆ كينو سالاسىنداعى جاڭاشىلدىق جايلى ءدارىس وقىدى.

بيىل حالىقارالىق گەوساياسي، ەكونوميكالىق، الەۋمەتتىك-مادەني دامۋ ماسەلەلەرى تالقىعا تۇسەتىن فورۋمدا 43 ەلدەن كەلگەن 500-گە جۋىق ساراپشى باس قوستى. فورۋمنىڭ ەكىنشى كۇنى جاساندى ينتەللەكت، دە-گلوباليزاتسيا، مەديا جاڭاشىلدىق تاقىرىبىندا جالعاستى.

 

"The Qazaq Times"