Körneki suret. Japoniya prem'er-ministri Sindzo Abe. Foto: mir24.tv

Japoniyanıñ Sırtqı ister ministri Taro Kano Ortalıq Aziya elderiniñ damuı men Qazaqstannıñ köpvektorlı sayasatına qatıstı pikir bildirdi.

Täjikstan astanası Duşanbe qalasında «Ortalıq Aziya+Japoniya» dialogına baylanıstı ötkiziletin Sırtqı ister ministrleriniñ 7-keñesi ayasında Japoniya tarapı postkeñestik eldermen jürgiziletin ekonomikalıq baylanıstı talqığa saldı. Taro Kano sözinde: «Birinşiden, Ortalıq Aziya elderine Japoniya Sırtqı ister ministri retinde alğaş ret qadam basqanıma quanıştımın. Atalğan şara ayasında Qazaqstan SİM Beybit Atamqwlovpen jäne özge de ministrlermen kezdesu ötkizip, mañızdı mäseleler turalı äñgime örbitemiz. Jaña kelisimderdi jüzege asıramız. Ekinşiden, Semey men Hirosima, Nagasakidiñ täjiribesi bar qos memleket BWW Qauipsizdik Keñesi siyaqtı halıqaralıq alañdarda yadrolıq qarudan azat älem qwru boyınşa tığız äriptestik ornattı. 1 mamırda Japoniyanıñ jaña imperatorı taqqa otırıp, basqarudıñ jaña däuiri bastaldı. Meniñ bwl jolğı saparım Japoniya men Ortalıq Aziyanıñ «ıntımaqtastığı tarihında» jaña tarau bolmaq», – dep mälimdedi.

Sonımen qatar, Taro Kano Japoniyanıñ köne astanası Nara qalasındağı qazına qoymasında VIII ğasırda Ortalıq Aziyadan äkelingen jädigerler saqtaulı ekendigin ayttı. Mälimetter boyınşa, Soñğı 26 jıl işinde Ortalıq Aziyadan Japoniyağa 10 mıñnan astam tälimger qabıldansa, auıl şaruaşılığı men  kölik qatınasın, ekonomika men densaulıq saqtau salasın, memlekettik basqaru men turizmdi damıtu bağıtında 3400 japoniyalıq sarapşı kelgen.

2004 jılı negizi qalanğan «Ortalıq Aziya+Japoniya» dialogı infraqwrılımdıq jäne medicina salaların damıtuğa bağıttalğan. 2015 jılı Japoniya prem'er-ministri Sindzo Abeniñ Ortalıq Aziyadağı bes memleketke tarihi saparı bastaldı. 2016 jıldıñ qaraşasında Nwrswltan Nazarbaev Japoniyağa resmi saparmen barğan. Al 2017 jılı taraptar diplomatiyalıq qarım-qatınastıñ 25 jıl toluına oray kezekti forum ötkizdi. 2018 jıldıñ mausımında Astanada Japoniya men Qazaqstannıñ ekonomikalıq ıntımaqtastığı jönindegi ükimettik jäne jeke sektordıñ birlesken komissiyasınıñ 7-otırısı ötti. Endi Japoniya 2020 jılı Tokioda ötkiziletin Olimpiada jäne Paralimpiada oyındarı qarsañında qazaqstandıq sportşılardı Kaşihara (Nara prefekturası), Kurume (Fukuoka prefekturası) jäne YUki (Ibaraki prefekturası) qalalarında qabıldamaq.

"The Qazaq Times"