جاپونيا ءسىم قازاقستان ساياساتىنا قاتىستى پىكىر ءبىلدىردى

جاپونيانىڭ سىرتقى ىستەر ءمينيسترى تارو كانو ورتالىق ازيا ەلدەرىنىڭ دامۋى مەن قازاقستاننىڭ كوپۆەكتورلى ساياساتىنا قاتىستى پىكىر ءبىلدىردى.

تاجىكستان استاناسى دۋشانبە قالاسىندا «ورتالىق ازيا+جاپونيا» ديالوگىنا بايلانىستى وتكىزىلەتىن سىرتقى ىستەر مينيسترلەرىنىڭ 7-كەڭەسى اياسىندا جاپونيا تاراپى پوستكەڭەستىك ەلدەرمەن جۇرگىزىلەتىن ەكونوميكالىق بايلانىستى تالقىعا سالدى. تارو كانو سوزىندە: «بىرىنشىدەن، ورتالىق ازيا ەلدەرىنە جاپونيا سىرتقى ىستەر ءمينيسترى رەتىندە العاش رەت قادام باسقانىما قۋانىشتىمىن. اتالعان شارا اياسىندا قازاقستان ءسىم بەيبىت اتامقۇلوۆپەن جانە وزگە دە مينيسترلەرمەن كەزدەسۋ وتكىزىپ، ماڭىزدى ماسەلەلەر تۋرالى اڭگىمە وربىتەمىز. جاڭا كەلىسىمدەردى جۇزەگە اسىرامىز. ەكىنشىدەن، سەمەي مەن حيروسيما، ناگاساكيدىڭ تاجىريبەسى بار قوس مەملەكەت بۇۇ قاۋىپسىزدىك كەڭەسى سياقتى حالىقارالىق الاڭداردا يادرولىق قارۋدان ازات الەم قۇرۋ بويىنشا تىعىز ارىپتەستىك ورناتتى. 1 مامىردا جاپونيانىڭ جاڭا يمپەراتورى تاققا وتىرىپ، باسقارۋدىڭ جاڭا ءداۋىرى باستالدى. مەنىڭ بۇل جولعى ساپارىم جاپونيا مەن ورتالىق ازيانىڭ «ىنتىماقتاستىعى تاريحىندا» جاڭا تاراۋ بولماق»، – دەپ مالىمدەدى.

سونىمەن قاتار، تارو كانو جاپونيانىڭ كونە استاناسى نارا قالاسىنداعى قازىنا قويماسىندا VIII عاسىردا ورتالىق ازيادان اكەلىنگەن جادىگەرلەر ساقتاۋلى ەكەندىگىن ايتتى. مالىمەتتەر بويىنشا، سوڭعى 26 جىل ىشىندە ورتالىق ازيادان جاپونياعا 10 مىڭنان استام تالىمگەر قابىلدانسا، اۋىل شارۋاشىلىعى مەن  كولىك قاتىناسىن، ەكونوميكا مەن دەنساۋلىق ساقتاۋ سالاسىن، مەملەكەتتىك باسقارۋ مەن ءتۋريزمدى دامىتۋ باعىتىندا 3400 جاپونيالىق ساراپشى كەلگەن.

2004 جىلى نەگىزى قالانعان «ورتالىق ازيا+جاپونيا» ديالوگى ينفراقۇرىلىمدىق جانە مەديتسينا سالالارىن دامىتۋعا باعىتتالعان. 2015 جىلى جاپونيا پرەمەر-ءمينيسترى سيندزو ابەنىڭ ورتالىق ازياداعى بەس مەملەكەتكە تاريحي ساپارى باستالدى. 2016 جىلدىڭ قاراشاسىندا نۇرسۇلتان نازارباەۆ جاپونياعا رەسمي ساپارمەن بارعان. ال 2017 جىلى تاراپتار ديپلوماتيالىق قارىم-قاتىناستىڭ 25 جىل تولۋىنا وراي كەزەكتى فورۋم وتكىزدى. 2018 جىلدىڭ ماۋسىمىندا استانادا جاپونيا مەن قازاقستاننىڭ ەكونوميكالىق ىنتىماقتاستىعى جونىندەگى ۇكىمەتتىك جانە جەكە سەكتوردىڭ بىرلەسكەن كوميسسياسىنىڭ 7-وتىرىسى ءوتتى. ەندى جاپونيا 2020 جىلى توكيودا وتكىزىلەتىن وليمپيادا جانە پاراليمپيادا ويىندارى قارساڭىندا قازاقستاندىق سپورتشىلاردى كاشيحارا (نارا پرەفەكتۋراسى), كۋرۋمە (فۋكۋوكا پرەفەكتۋراسى) جانە يۋكي (يباراكي پرەفەكتۋراسى) قالالارىندا قابىلداماق.

"The Qazaq Times"