F-35 jauıngerlik wşağı. Foto: VOA.

Keşe AQŞ Qorğanıs ministrligi mälimdeme jasap, Türkiyağa F-35 jauıngerlik wşaqtarınıñ bölşekteri men nwsqaulıqtarın berudi toqtatqanın habarladı. Bwl AQŞ-Türkiya arasındağı soñğı sayasi qayşılıqtardı tağı bir satığa köterdi.

AQŞ tarabı soñğı birneşe ayda Türkiyağa reseylik S-400 zımıran qorğanıs jüyesin satıp aludan bas tartıp, amerikalıq qorğanıs jüyesin paydalanudı talap etip kelgen. Eger Türkiya Resey qorğanıs jüyesin satıp aludı jalğastırsa F-35 jauıngerlik wşaqtarın paydalanu mümkindigin şekteytinin eskertken edi.

Türkiya  F-35 jauıngerlik wşaqtarın öndiru men paydalanuğa qatısqan sanaulı eldiñ biri. Sonday-aq, Qwrama Ştattardıñ NATO wyımındağı odaqtası. AQŞ osı jazda Türkiyağa beruge tiisti F-35 wşaqtarına qatıstı bölşekteri men nwsqaulıqtarın jetkizudi toqtattı. Bwl Türkiyanıñ Resey qorğanıs jüyesin paydalanuına qarsı alğaşqı naqtı şara deuge boladı.

AQŞ tarabı Türkiyağa Resey qorğanıs jüyesi NATO müşeleri paydalanatın zımırandar men oğan qarsı jüyelerge üylespeytinin, tipti F-35 wşaqtarına da qauip töndirui mümkin ekenin birneşe ret eskertken. Türkiya prezidenti Erdoğan naurızdıñ bas şeninde bwğan qatıstı mälimdeme jasap, Türkiyanıñ Reseyden zımıran qorğanıs jüyesin satıp aluı, wzaq uaqıttan keyin jasalğan şeşim ekenin, äri bwl şeşimdi özgertpeytinin aytqan. Tipti, kerek bolğan jağdayda Reseyden S-500 jüyesin de satıp alatının aytqan.

Türkiya atalğan orıs qorğanıs qaruın satıp alu şeşimine Süriya soğısınan keyin kelgen. Süriyadağı qaqtığıs bastalğan kezde Türkiya öz keñistigine zımıran şabuıl qauipteriniñ töngenin NATO-ğa birneşe ret aytqan. Alayda, NATO tarabı Italiya men Şığıs Europadağı zımıran qorğanıs jüyelerin Türkiyağa jetkizudi türli sebeptermen keşiktirdi. Türkiya NATO-nı qajet kezinde äue keñistigimizge töngen qaterge qarsı äreket etpedi dep ayıptap, reseylik qorğanıs jüyesin satıp alu şeşimin jariya etken bolatın.

“The Qazaq Times”