اقش تۇركيانىڭ F-35 ۇشاعىن پايدالانۋ مۇمكىندىگىن شەكتەمەك

كەشە اقش قورعانىس مينيسترلىگى مالىمدەمە جاساپ، تۇركياعا F-35 جاۋىنگەرلىك ۇشاقتارىنىڭ بولشەكتەرى مەن نۇسقاۋلىقتارىن بەرۋدى توقتاتقانىن حابارلادى. بۇل اقش-تۇركيا اراسىنداعى سوڭعى ساياسي قايشىلىقتاردى تاعى ءبىر ساتىعا كوتەردى.

اقش تارابى سوڭعى بىرنەشە ايدا تۇركياعا رەسەيلىك S-400 زىمىران قورعانىس جۇيەسىن ساتىپ الۋدان باس تارتىپ، امەريكالىق قورعانىس جۇيەسىن پايدالانۋدى تالاپ ەتىپ كەلگەن. ەگەر تۇركيا رەسەي قورعانىس جۇيەسىن ساتىپ الۋدى جالعاستىرسا F-35 جاۋىنگەرلىك ۇشاقتارىن پايدالانۋ مۇمكىندىگىن شەكتەيتىنىن ەسكەرتكەن ەدى.

تۇركيا  F-35 جاۋىنگەرلىك ۇشاقتارىن ءوندىرۋ مەن پايدالانۋعا قاتىسقان ساناۋلى ەلدىڭ ءبىرى. سونداي-اق، قۇراما شتاتتاردىڭ ناتو ۇيىمىنداعى وداقتاسى. اقش وسى جازدا تۇركياعا بەرۋگە ءتيىستى F-35 ۇشاقتارىنا قاتىستى بولشەكتەرى مەن نۇسقاۋلىقتارىن جەتكىزۋدى توقتاتتى. بۇل تۇركيانىڭ رەسەي قورعانىس جۇيەسىن پايدالانۋىنا قارسى العاشقى ناقتى شارا دەۋگە بولادى.

اقش تارابى تۇركياعا رەسەي قورعانىس جۇيەسى ناتو مۇشەلەرى پايدالاناتىن زىمىراندار مەن وعان قارسى جۇيەلەرگە ۇيلەسپەيتىنىن، ءتىپتى F-35 ۇشاقتارىنا دا قاۋىپ ءتوندىرۋى مۇمكىن ەكەنىن بىرنەشە رەت ەسكەرتكەن. تۇركيا پرەزيدەنتى ەردوعان ناۋرىزدىڭ باس شەنىندە بۇعان قاتىستى مالىمدەمە جاساپ، تۇركيانىڭ رەسەيدەن زىمىران قورعانىس جۇيەسىن ساتىپ الۋى، ۇزاق ۋاقىتتان كەيىن جاسالعان شەشىم ەكەنىن، ءارى بۇل شەشىمدى وزگەرتپەيتىنىن ايتقان. ءتىپتى، كەرەك بولعان جاعدايدا رەسەيدەن S-500 جۇيەسىن دە ساتىپ الاتىنىن ايتقان.

تۇركيا اتالعان ورىس قورعانىس قارۋىن ساتىپ الۋ شەشىمىنە ءسۇريا سوعىسىنان كەيىن كەلگەن. سۇرياداعى قاقتىعىس باستالعان كەزدە تۇركيا ءوز كەڭىستىگىنە زىمىران شابۋىل قاۋىپتەرىنىڭ تونگەنىن ناتو-عا بىرنەشە رەت ايتقان. الايدا، ناتو تارابى يتاليا مەن شىعىس ەۋروپاداعى زىمىران قورعانىس جۇيەلەرىن تۇركياعا جەتكىزۋدى ءتۇرلى سەبەپتەرمەن كەشىكتىردى. تۇركيا ناتو-نى قاجەت كەزىندە اۋە كەڭىستىگىمىزگە تونگەن قاتەرگە قارسى ارەكەت ەتپەدى دەپ ايىپتاپ، رەسەيلىك قورعانىس جۇيەسىن ساتىپ الۋ شەشىمىن جاريا ەتكەن بولاتىن.

“The Qazaq Times”