Ospan batırdıñ 120 jıldıq mereytoyına arnalğan konferenciya ötti. Foto: QT.

Bügin, 20 naurız Almatıdağı QR Wlttıq kitaphanasında qazaqtıñ XX ğasırdağı wltazattıq küresi jetekşileriniñ biri, azattıq jolında şahit keşken kökjal oğlanı Ospan batır Silämwlınıñ tuğanına 120 jıl toluına arnalğan baspasöz konferenciyası ötti.

«Er Jänibek» halıqaralıq qoğamdıq qorınıñ wyımdastırğan, Ospan batırdıñ 120 jıldıq mereytoyınıñ bastaluına arnalğan jiınğa tarihşı-qalamgerler, ziyalı qauım men baspasöz ökilderi qatıstı.

Baspasöz jiının Ş. Uälihanov atındağı Tarih jäne etnologiya institutınıñ direktorı Ziyabek Qabıldinov bastap aştı. «Er Jänibek» halıqaralıq qorınıñ prezidenti Jeñis Türkiya qor ayasında jıl boyı wyımdastırılatın şaralarmen qısqaşa tanıstırdı. Atalğan qor törağasınıñ aytuınşa, Ospan batırdıñ 120 jıldığına oray Qazaqstannan tıs Türkiya, Moñğoliya, Resey, Franciya jäne Germaniya elderinde türli şaralar wyımdastırılıp, mereytoy halıqaralıq deñgeyde atalıp ötiledi.

Batırdıñ tike wrpağı Örken Näbiwlı öz oyımen bölisti. Foto: QT,

Atalğan jinalısta Qazaqstan Halıq jazuşısı Qabdeş Jwmädilov, aqın Järken Bödeş, Temirhan Tebegenov, Arıstan qajı Şädetwlı, Örken Näbiwlı (batırdıñ nemeresi), Jädi Şäkenwlı, Mwrat Şaymaran qatarlı jiın qatısuşıları Ospan batır jäne onıñ mereytoyına arnalğan şaralar jöninde öz oyların ortağa saldı.

  • Ospan batırdıñ 120 jıldığına oray ötkiziletin şaralarda qazaq küresinen respublikalıq turnir (29-30 naurız künderi);
  • Säuir ayında «Swlubaydıñ äni» attı teatrlanğan qoyılım men  halıqaralıq jır müşayrası jäne bwqaralıq aqparat qwraldarına arnalğan bäyge jariyalanadı;
  • Bwlarmen qatar Türkiya ortalıq qalası Ankaradağı Mimar Sinan universitetinde Ospan batırğa arnalğan ğılımi talqı otırısı bolmaq;
  • Mamır ayında Moñğoliyanıñ Bayanölgey aymağında as berilip, arnayı jiın ötkizilse, mausımda osığan wqsas şara Reseydiñ Obı qalasında ötkizilmek; Mausım ayında dästürli «Er Janibek Cup» şağın futboldan turnir batırdıñ merey toyına arnalıp, älem qazaq jastarı Kökşetauda bas qospaq;
  • Tamız ayında Şığıs Qazaqstan oblısında as berilip, aqparat qwraldarına jariyalanğan bäykeni qorıtındılaudı josparlağan;
  • Qırküyek ayında Ospan batır turalı monografiyanıñ tanıstırılımı ötkiziledi;
    Qazan ayında ŞQO-da batır atındağı meşittiñ aşılu saltı;
  • Qaraşa ayında Astana qalasında «Ospan batırdıñ 120 jıldığın» taqırıp etken respublikalıq aytıs ötpek;
  • Jeltoqsan ayında jalpı şaralardıñ qorıtındısı Almatıda jasaludı josparlağan;

Konferenciyağa qatısuşılar. Foto: QT.

Ospan batır Silämwlınıñ 120 jıldıq mereytoyına oray ötkiziletin şaralarğa «Er Jänibek» qorımen birge, «Otandastar» qorı,  Ş. Uälihanov atındağı Tarih jäne etnologiya institutı, Kökşetau jäne ŞQO äkimdigi, özge de BAQ ökilderi men qoğamdıq wyımdar qoldau körsetpek.

“The Qazaq Times”