«Kortogoy»-dıñ soñğı ret qolğa tüsui. Foto: BBC

«Kortogoy» attı laqap atpen tanılğan, älemde qılmıs äleminiñ «şonjarı» meksikalıq Hoakin Gusmannıñ üstinen sot isi jürip jatır. Gusman älemdegi eñ iri esirtki tasımaldaytın wyımdardıñ biri «Sinaloa» wyımına jetekşilik etip kelgen. Oğan tağılğan 10 türli qılmıs ayıbın Bruklin Federaldıq sotı tört ay uaqıt işinde qaramaq.

Gusman soñğı 20 jıl işinde Qwrama Ştattar tarabınan eñ köp izdelgen qılmısker bolatın. Tek, 2016 jılı qañtarda ğana «Kortogoydı» twtqındap, AQŞ-qa ekstradiciyalağan edi. Oğan tağılğan ayıptardıñ arasında «25 jıl işinde AQŞ-qa 155 tonna esirtki önimderin zañsız kirgizgen» deytinderi de bar.

Hoakin Gusman 1953 jılı qaltalı fermerdiñ otbasında düniege kelip, Latın Amerika men Soltüstik Amerikadağı esirtki saudasınıñ ortasında jetilgen. Onıñ qılmıs älemindegi ıqpalı qısqa ğana uaqıt işinde ösip, 1980 jıldardıñ soñında «Sinaloa» attı esirtki tasımaldauşı qılmıstıq tobın qwrğan. Jalpı Qwrama Ştattıñ oñtüstik şekarasınan kiretin esirtki önimderiniñ törtten biri «Sinaloa» arqılı kirgen.

Gusman Meksika türmelerinen talay märte qaşıp şıqqan. 2001 jılı türme qızmetkerlerin satıp alıp, eñ qatal rejimdegi abaqtıdan qaşıp şıqqan. Älemdegi №1 narko-banda sanalatın Gusman 2014 jılı qayta qolğa tüsken. Alayda, bir jıldan keyin bir şaqırımdıq jer astı jolın qazdırıp qaşıp ketken. Onıñ sol retki türmeden qaşuına kömek körsetken 6 adam twtqındalğan bolatın.

Jartı jıldan keyin qayta qolğa tüsken «Kortogoy» AQŞ-qa ekstradiciyalandı. Alayda, N'yu-Yorktegi sotta özine tağılğan ayıptardıñ birde birin moyındamadı. Wzaqqa sozılğan bwl sotta 56 kuäger sotqa tartılğan, onıñ 14-i qılmıs älemniñ ökilderi bolğan. Olar qwqıq qorğau organdarımen selbesuge öz erkimen kelgen delinedi. Tipti, qılmıs äleminde Gusmanğa oñ qol bolğan Aleks Sifuentes «Kortogoydıñ» jas-öspirim qızdarğa zorlıq jasağanı turalı derekterdi wsınğan. Sifuentes bwdan tıs, Gusmannıñ sayasatkerlerdi satıp alıp otırğanın, tipti Meksikanıñ bwrınğı prezidenti Enrike Pen'ya N'etogoğa 100 mln AQŞ dolları köleminde para bergenin de aytqan.

Oğan tağılğan 10 ayıp boyınşa dälelder negizinen tolıq bolğan. Alda Gusmandı ömir boyı qamau jazasına kesui mümkin dep kütiledi. Bwl da Qwrama Ştattıñ Meksika şekarasına qatañ sayasatınıñ bir körinisi bolıp qaldı. Degenmen, Latın Amerikadan soltüstikke ağılğan esirtki tasımalı äli de toqtap qalmağanı anıq. Bwl közge körinbeytin jelide jüz milliondağan dollar kölemindegi qarjı aynalıp, qılmıs düniesiniñ «serkelerin» semirtip keledi.

“The Qazaq Times”