Serbiyadağı halıq ereuili. Foto: bm,com

Serbiya halqı el prezidenti Aleksandr Vuçiçtiñ otstavkağa ketuin talap etip, ereuilge şıqtı. Bwl turalı dsnews.ua habarladı. 

Prezident rezidenciyasına jinalğan mıñdağan twrğınnıñ ereuilge şığuına Vuçiçtiñ oppoziciyalıq toptarğa qatıstı pikiri men biliktiñ oppozicionerlerge qarsı bağıtta boluı sebep bolğan. Osığan deyin Serbiya prezidenti jergilikti telearnalarğa bergen swhbattarınıñ birinde: «Men jäne bizdiñ bilik wstanğan sayasatqa 5 million adam qarsılıq bildirse de aytqanımnan qaytpaymın», – dep aytqan. Osı pikirden keyin halıq narazılığı artıp, jekrgilikti twrğındar bilikte şwğıl reformalar jürgizilip, prezidenttiñ auısuın talap etti. Ereuilge şıqqandardıñ biri eldegi halıq jağdayınıñ naşar ekendigin jäne saylauda öz erkimen dauıs bere almaytının aytqan.

Mälimetter boyınşa, Belgrad köşelerine qırıq mıñğa juıq adam jinalğan. Biliktegi özgeristerden bölek, narazı top jergilikti RTS telearnasına barıp Serbiyadağı jurnalistikanıñ ädil jäne beytarap boluın, memlekettegi şındıqtı bwrmalamay aqparat taratu kerektigin ayttı. Aldağı uaqıtta tağı da narazılıq akciyaları wyımdastırıluı mümkin.

"The Qazaq Times"