سەربياداعى حالىق ەرەۋىلى. فوتو: bm,com

سەربيا حالقى ەل پرەزيدەنتى الەكساندر ءۆۋچيچتىڭ وتستاۆكاعا كەتۋىن تالاپ ەتىپ، ەرەۋىلگە شىقتى. بۇل تۋرالى dsnews.ua حابارلادى. 

پرەزيدەنت رەزيدەنتسياسىنا جينالعان مىڭداعان تۇرعىننىڭ ەرەۋىلگە شىعۋىنا ءۆۋچيچتىڭ وپپوزيتسيالىق توپتارعا قاتىستى پىكىرى مەن بيلىكتىڭ وپپوزيتسيونەرلەرگە قارسى باعىتتا بولۋى سەبەپ بولعان. وسىعان دەيىن سەربيا پرەزيدەنتى جەرگىلىكتى تەلەارنالارعا بەرگەن سۇحباتتارىنىڭ بىرىندە: «مەن جانە ءبىزدىڭ بيلىك ۇستانعان ساياساتقا 5 ميلليون ادام قارسىلىق بىلدىرسە دە ايتقانىمنان قايتپايمىن»، – دەپ ايتقان. وسى پىكىردەن كەيىن حالىق نارازىلىعى ارتىپ، جەكرگىلىكتى تۇرعىندار بيلىكتە شۇعىل رەفورمالار جۇرگىزىلىپ، پرەزيدەنتتىڭ اۋىسۋىن تالاپ ەتتى. ەرەۋىلگە شىققانداردىڭ ءبىرى ەلدەگى حالىق جاعدايىنىڭ ناشار ەكەندىگىن جانە سايلاۋدا ءوز ەركىمەن داۋىس بەرە المايتىنىن ايتقان.

مالىمەتتەر بويىنشا، بەلگراد كوشەلەرىنە قىرىق مىڭعا جۋىق ادام جينالعان. بيلىكتەگى وزگەرىستەردەن بولەك، نارازى توپ جەرگىلىكتى رتس تەلەارناسىنا بارىپ سەربياداعى جۋرناليستيكانىڭ ءادىل جانە بەيتاراپ بولۋىن، مەملەكەتتەگى شىندىقتى بۇرمالاماي اقپارات تاراتۋ كەرەكتىگىن ايتتى. الداعى ۋاقىتتا تاعى دا نارازىلىق اكتسيالارى ۇيىمداستىرىلۋى مۇمكىن.

"The Qazaq Times"