Çıñdu şaharındağı şirkeu. Foto: BBC/GETTY IMAGES.

Rojdestvo merekesi jaqındağan sayın Qıtay biligi eldegi hristian şirkeulerin tintu, hristian müritterin qamauğa alu äreketterin jiiletti. 9 jeltoqsanda Çıñdu (Çendu) qalasındağı iri hristian qoğamınıñ şirkeuin tintu jürgizip, şirkeuge kirgen 100-den astam adamdı qamauğa alğan. Bwl turalı BBC aqparattıq qızmeti habarlağan bolatın.

Çıñdu qalasındağı bwl şirkeu Qıtaydağı eñ iri hristian wyımınıñ biri «Küzgi jauın ösietine» tän. 9 jeltoqsandağı operaciya kezinde wyım jetekşisi Van I men onıñ äyeli de qamauğa alınğan. Derekközderiniñ mälimdeuinşe, olarğa QHR-da eñ auır jazamen jazalanatın «memleketti bölşekteuge şaqırğan» degen ayıp ayıptalğan. Van men onıñ äyeli keminde 15 jılğa deyin bas bostandığınan ayırıluı mümkin.

15 jeltoqsanda ondağan policiya qızmetkeri Guañjou qalasındağı Junguyli şirkeuine balalar sabaq oqıp jatqan uaqıtta basıp kirip, şirkeu bwyımdarın, 4 mıñnan astam Bibliya kitaptarın tärkilegen. Sonımen birge, şirkeuge kelgenderdiñ atı-jöni men baylanıs nömerlerin estelikke alğan. Junguyli şirkeuin jauıp, qaladağı hristian ökilderin bilik tarabınan birneşe protestanttıq wyımdar men katolik toptarın birlestirgen şirkeuge baruğa şaqırğan.

Statistikalıq derekterge süyensek, 1,5 mlrd-qa juıq halqı bar Qıtayda 100 millionğa juıq hristian ökilderi jasaydı. Bwlardan tıs jasırın hristian toptarı da bar. Qıtay biligi dini nanım-senim bostandığın qwrmetteytinin aytqan jäne din bostandığın wstanğan el retinde aytıladı. Biraq, wzaq jıldar boyı din liderleri Qıtayda quğın-sürginge wşırap keldi. Adam qwqığın qorğau wyımdarınıñ aytuınşa, din bostandığı turalı Qıtay biliginiñ mälimdemesi men is-äreketi mülde säykes kelmeydi. Şınjañ jerindegi meşitterde memleket pen QKP-nıñ tuın iluge mindetteydi.

Derbes dini toptardı Beyjiñ biligi öziniñ twraqtılığına qauip retinde sanaytını belgili. Qıtayda soñğı kezdegi hristian şirkeulerine jürgizilgen reydter Human Rights Watch wyımı jağınan ayıptauğa wşıradı. Bwl wyım mälimdemesinde bükil älemdi Qıtaydağı dini erkindikke qarsı jasalıp jatqan äreketterge, repressiyağa qarsı küresuge şaqırğan.

“The Qazaq Times”