چىڭدۋ شاھارىنداعى شىركەۋ. فوتو: BBC/GETTY IMAGES.

روجدەستۆو مەرەكەسى جاقىنداعان سايىن قىتاي بيلىگى ەلدەگى حريستيان شىركەۋلەرىن ءتىنتۋ، حريستيان مۇريتتەرىن قاماۋعا الۋ ارەكەتتەرىن جيىلەتتى. 9 جەلتوقساندا چىڭدۋ (چەندۋ) قالاسىنداعى ءىرى حريستيان قوعامىنىڭ شىركەۋىن ءتىنتۋ جۇرگىزىپ، شىركەۋگە كىرگەن 100-دەن استام ادامدى قاماۋعا العان. بۇل تۋرالى BBC اقپاراتتىق قىزمەتى حابارلاعان بولاتىن.

چىڭدۋ قالاسىنداعى بۇل شىركەۋ قىتايداعى ەڭ ءىرى حريستيان ۇيىمىنىڭ ءبىرى «كۇزگى جاۋىن وسيەتىنە» ءتان. 9 جەلتوقسانداعى وپەراتسيا كەزىندە ۇيىم جەتەكشىسى ۆان ي مەن ونىڭ ايەلى دە قاماۋعا الىنعان. دەرەككوزدەرىنىڭ مالىمدەۋىنشە، ولارعا قحر-دا ەڭ اۋىر جازامەن جازالاناتىن «مەملەكەتتى بولشەكتەۋگە شاقىرعان» دەگەن ايىپ ايىپتالعان. ۆان مەن ونىڭ ايەلى كەمىندە 15 جىلعا دەيىن باس بوستاندىعىنان ايىرىلۋى مۇمكىن.

15 جەلتوقساندا ونداعان پوليتسيا قىزمەتكەرى گۋاڭجوۋ قالاسىنداعى جۋنگۋيلي شىركەۋىنە بالالار ساباق وقىپ جاتقان ۋاقىتتا باسىپ كىرىپ، شىركەۋ بۇيىمدارىن، 4 مىڭنان استام بيبليا كىتاپتارىن تاركىلەگەن. سونىمەن بىرگە، شىركەۋگە كەلگەندەردىڭ اتى-ءجونى مەن بايلانىس نومەرلەرىن ەستەلىككە العان. جۋنگۋيلي شىركەۋىن جاۋىپ، قالاداعى حريستيان وكىلدەرىن بيلىك تارابىنان بىرنەشە پروتەستانتتىق ۇيىمدار مەن كاتوليك توپتارىن بىرلەستىرگەن شىركەۋگە بارۋعا شاقىرعان.

ستاتيستيكالىق دەرەكتەرگە سۇيەنسەك، 1,5 ملرد-قا جۋىق حالقى بار قىتايدا 100 ميلليونعا جۋىق حريستيان وكىلدەرى جاسايدى. بۇلاردان تىس جاسىرىن حريستيان توپتارى دا بار. قىتاي بيلىگى ءدىني نانىم-سەنىم بوستاندىعىن قۇرمەتتەيتىنىن ايتقان جانە ءدىن بوستاندىعىن ۇستانعان ەل رەتىندە ايتىلادى. بىراق، ۇزاق جىلدار بويى ءدىن ليدەرلەرى قىتايدا قۋعىن-سۇرگىنگە ۇشىراپ كەلدى. ادام قۇقىعىن قورعاۋ ۇيىمدارىنىڭ ايتۋىنشا، ءدىن بوستاندىعى تۋرالى قىتاي بيلىگىنىڭ مالىمدەمەسى مەن ءىس-ارەكەتى مۇلدە سايكەس كەلمەيدى. شىنجاڭ جەرىندەگى مەشىتتەردە مەملەكەت پەن قكپ-نىڭ تۋىن ىلۋگە مىندەتتەيدى.

دەربەس ءدىني توپتاردى بەيجىڭ بيلىگى ءوزىنىڭ تۇراقتىلىعىنا قاۋىپ رەتىندە سانايتىنى بەلگىلى. قىتايدا سوڭعى كەزدەگى حريستيان شىركەۋلەرىنە جۇرگىزىلگەن رەيدتەر Human Rights Watch ۇيىمى جاعىنان ايىپتاۋعا ۇشىرادى. بۇل ۇيىم مالىمدەمەسىندە بۇكىل الەمدى قىتايداعى ءدىني ەركىندىككە قارسى جاسالىپ جاتقان ارەكەتتەرگە، رەپرەسسياعا قارسى كۇرەسۋگە شاقىرعان.

“The Qazaq Times”