AQŞ Senatı. Foto: vestikavkaza

AQŞ Senatı Reseydiñ Kerş bwğazındağı äreketterine jauap retinde qatañ operaciya ötkizu turalı qarar qabıldadı.

Qarardı Wlttıq qauipsizdik jönindegi Senat komitetiniñ törağası Ron Djonson jäne Senatta demokrattardıñ partiyalıq wyımdastıruşısı Riçard Durbin dayındağan. Senattıñ 40-tan astam müşesi qol qoyğan qarardıñ avtorları AQŞ Kerş bwğazındağı Reseydiñ is-qimılına jäne osığan deyingi orın alğan «agressiyalıq sayasatqa» qarsı şaralardı küşeytui tiis deydi.

25 qaraşada Resey Kerş bwğazında Ukraina äskeri-teñiz küşteriniñ üş kemesin basıp alıp, oq atqan. Ukraina prezidenti Petr Poroşenko Reseydiñ bwl äreketin «basqınşılıq» dep atap, olardan Azov teñizinde wstalğan Ukraina äskeri kemeleri men teñizşilerin dereu bosatudı talap etti. Al Mäskeu kemeler Qırımğa jaqın teñizde Resey şekarasın bwzdı dep ayıptaydı.

Foto: www.bbc.com

Kiev pen Mäskeu teketiresine qaktıstı qabıldanğan AQŞ Senatınıñ rezolyuciyası halıqaralıq deñgeyde tanılğan şekaralar boyınşa eki jaqtı kelisimderge qoldau körsetuge jäne Kerş bwğazı men Azov teñizi arqılı kemelerdiñ qauipsiz ötuin qamtamasız etuge bağıttalğan. Senatorlar mwnday qadam «Reseydiñ şamadan tıs aumaqtıq qaqtığıstarına toytarıs beredi» dep sanaydı. Bwğan qatıstı Senat komitetiniñ törağası Ron Djonson: «AQŞ pen bizdiñ odaqtastarımız Kerş bwğazındağı Reseydiñ äskeri agressiyasına tez arada batıl qadam jasau arqılı jauap beredi. Halıqaralıq teñiz operaciyasın jürgizu Qara teñizden Azovqa deyin qauipsizdikti qamtamasız etui tiis», – deydi.

Ukraina Wlttıq qauipsizdik jäne qorğanıs keñesiniñ basşısı Aleksandr Turçinov BBC-ge bergen swhbatında: «Qauipsizdik salası biz üşin principke aynaladı. Eger biz keri şeginsek, Resey Qırımğa jasağanın qaytalap, Azov teñizin de basıp aladı», – deydi. Turçinov sonday-aq Ukraina Batıs seriktesterimen, sonıñ işinde NATO-men birlesken äskeri oqu-jattığulardı jalğastıratının ayttı. Bwğan qatıstı NATO bas hatşısı Yens Stoltenberg Ukrainanıñ aumaqtıq twtastığı men egemendigine, onıñ işinde halıqaralıq qwqıqqa säykes öziniñ aumaqtıq teñizinde erkin jüru qwqığına tolıq qoldau bildiretinin ayttı. Öz sözinde ol: «Resey Qırım anneksiyası men Kerştegi jağday üşin jauap beredi»,– dedi.

Resey prezidenti Vladimir Putin qaqtığıstı «şekaralıq oqiğa» dep atadı. «Bwl – sırttan wyımdastırılğan arandatuşılıq. Aldağı jıldıñ naurızında ötetin Ukrainadağı prezidenttik saylau üşin qoldan jasalıp otır», – dedi ol.

AQŞ-tıñ Wlttıq qauipsizdik jönindegi Senat komitetiniñ törağası Ron Djonson. Foto: dp

Senat qabıldağan qwjat NATO-nıñ Qara teñizde äskeri operaciyaların küşeytuge, al AQŞ prezidentiniñ Ukrainadağı äskeri kömek kölemin arttıruğa jäne oğan memlekettik departament, Qorğanıs ministrliginiñ kömegimen äskeri mümkindikterin küşeytu üşin qoldau körsetuge şaqıradı. Bwl Ukrainağa «reseylik agressiyadan qorğanuğa» ıqpal etedi. Sonımen qatar, senatorlar Aq üy basşısı Donal'd Trampqa «sankciyalar arqılı Amerikanıñ qarsılastarına şara qoldanu turalı» aktiniñ kömegimen Reseyge qarsı jaña qatañ qaulılar engizu turalı wsınıs bildirdi. Qararda bwdan bölek, Resey men Germaniya arasındağı «Soltüstik ağıs – 2» gaz qwbırı qwrılısınıñ jobası alınıp tastaluı tiis delingen.

«Reseydiñ arandatuşılıq äskeri äreketteri, sonday-aq onıñ kiberkeñistiktegi dezinformaciya boyınşa auqımdı isteri Vladimir Putinniñ Batıs pen Ukrainağa qatıstı öziniñ agressivti sayasatın toqtatudı közdemeytinin bildiredi jäne bwl bükil älemge eskertu bolıp sanaladı», – deydi AQŞ senatorı Durbin.

«Ukraina – erkin älemge qarsı Vladimir Putin bastağan küres maydanınıñ aldıñğı qatarında. Ukraina Amerika nemese Europağa olardıñ ornına soğıs jürgizudi eşqaşan swrağan emes. Ukraindıqtar bizdiñ kömekke mwqtaj jäne oğan äbden layıq», – dep mälimdedi Qarulı Küşter komitetiniñ basşısı, senator Inhof. Kerş bwğazındağı kemelerdi basıp alu, onıñ pikirinşe, Resey–Ukraina qaqtığısınıñ qauipti eskalaciyası.

"The Qazaq Times"