Bügin, 16 jeltoqsan Täuelsizdik künine oray, Almatıdağı Respublika alañında Täuelsizdik monumentine saltanattı gül şoqtarın qoyu räsimi ötti.

Şarağa Almatı qalası äkimdigi, 1986 jılğı Jeltoqsan oqiğasına qatısuşılar, auğan soğısınıñ ardagerleri, jastar wyımdarınıñ ökilderi jäne qala twrğındarı men qonaqtarı qatıstı.

Almatı qalasınıñ äkimi Bauırjan Baybek bastap Täuelsizdik monumentine gül şoqtarın qoydı. Saltanattı şaranı äskeri orkestr muzıkamen süyemeldedi. Degenmen, jıldağıday bilik, qalalıq äkimdik ökilderi täuelsizdikpen qwttıqtau sözin söylemedi.  Alañdı qorşağan qauipsizdikti qorğau qızmetkerleri de az bolğan joq.

Saltanattı şara kursanttardıñ paradımen tämamdaldı. Saltanattı şaradan keyin Jeltoqsanşılar, qala twrğındarı Jeltoqsan oqiğasınıñ qwrbandarın eske alıp, qwran bağıştadı. El men jerdiñ amandığın, täuelsizdiktiñ bayanın swrağan dwğa-tilekke qol jaydı.

16 Jeltoqsan qazaq eli üşin eñ qasterli künderdiñ biri. 1986 jılı däl osı küni qazaq ruhı jañğırıp, qızıl imperiyanıñ temir tegeurinine qarsı öz narazılığın bildirip, mıñdağan qazaq jastarı Jeltoqsan alañına jinalğan edi. 1991 jılı Qazaq eli täuelsiz, azat el bolıp jariyalanğan bolatın.

Bügin sonday-aq, Jañaözen oqiğasın da eske alu küni. Täuelsiz qazaq eliniñ tarihında alğaş ret bilik öz halqına oq atıp, saldarınan 16 adam qaza tauıp, 100-ge juıq adam zardap şekken bolatın.

 

“The Qazaq Times” portalı, täuelsiz qazaq elin, barşa qazaqtı täuelsizdik tañı atqan eñ qasterli merekesimen tağı bir märte qwttıqtaymız! Täuelsizdik, teñdik, erkindik üşin şähit keşken bozdaqtarımızdıñ ruhına izet-qwrmet bildiremiz!

“The Qazaq Times”