Foto: cnn.com

Amerikalıq Time jurnalı «Jıl adamı» atağına layıqtı jurnalisterdi atadı. Olardıñ biri – kolumnist, «Washington Post» basılımınıñ tilşisi Jamal Haşoggi.

Üzdikter qatarında filippindik oppoziciyalıq portal redaktorı Mariya Ressa, M'yanmadağı rohindja mwsılmandarına qatıstı zorlıq-zombılıqtı tergegeni üşin sottalğan «Reuters» agenttiginiñ jurnalisteri Va Lon jäne K'ya So, sonday-aq qarulı qaqtığıstan qaza tapqan amerikandıq «Capital Gazette» redakciyasınıñ wjımı kirdi. Time osı atalğan tilşilerdi «Älem saqşıları» dep atadı. Basılım portalında «olar eşbir qauip-qaterge qaramastan, ädildik izdegeni, naqtı faktilerdi tapqanı üşin jäne mamandığına adal bolıp, batıldıq tanıtqanı üşin jıl adamı boluğa layıqtı» delingen.

Jaqında jariyalanğan «Jıl adamı» atağınan ümitkerler tiziminde AQŞ prezidenti Donal'd Tramp, AQŞ-tıñ arnayı prokurorı Robert Myuller, Resey prezidenti Vladimir Putin, Britaniya hanzadası Garri men gercoginya Megan bolğan.

«Älem saqşıları»

  • Saud Arabiyalıq tilşi, «Washington Post» gazetiniñ şoluşısı Mwhamed Jamal Haşoggi öziniñ sıni zertteu, maqalalarımen tanılğan. 2 qazanda ol Istambwldağı Saud Arabiyası konsuldığına barğan soñ, izim-ğayım joğalıp ketti. Bastapqıda saudiyalıq bilik jurnalistiñ ölimi faktisin joqqa şığardı, alayda 20 qazanda eldiñ Bas prokuraturası Haşoggidiñ töbeles kezinde qaza bolğanın habarladı. Birneşe künnen keyin Haşoggidiñ qasaqana öltirilgeni anıqtaldı.

Saudiyalıq jurnalist Jamal Haşoggi. Foto: www.bbc.com

Jaqında Türkiya prezidenti äkimşiliginiñ jwrtşılıqpen baylanıs basqarmasınıñ basşısı Fahrettin Altun Istambwldağı Saud Arabiyasınıñ Bas konsulı Mohammed Alotaibi jurnalistiñ qazasına tikeley qatıstı dep mälimdedi.

  • Filippindegi oppoziciyalıq portal redaktorı Mariya Ressa bwrın CNN telearnasında jwmıs istegen. 2012 jılı ol Filippin prezidenti Rodrigo Duterteniñ ädiletsizdigin äşkereleuge arnalğan sıni maqalalardan twratın tanımal «Rappler» jañalıqtar portalın aştı.

    Foto: cnn.com

  • Va Lon men K'ya – M'yanmadağı jağdaylardı zertteumen aynalısqan «Reuters» agenttiginiñ tilşileri. Qırküyekte M'yanma sotı qos tilşige rohindja mwsılmandarı turalı materialdarmen jwmıs isteu kezinde memlekettik qwpiya turalı zañdı bwzğanı üşin 7 jılğa bas bostandığınan ayıru turalı ükim şığardı.

    Foto: cnn.com

  • Merilend ştatındağı «Capital Gazette» gazetiniñ tört jurnalisi qarulı er adamnıñ şabuılınan qaza taptı. Keyinnen şabuıl jasağan adamnıñ bwrın gazetke qarsı sotta jeñilis tapqanı üşin tilşilerdi ädeyi öltirgeni anıqtaldı.

    Foto: cnn.com

Time maqalasında «Saqşılar» jäne «Şındıq üşin soğıs» degen atpen biliktiñ qudalauı nemese şabuıldar nätijesinde zardap şekken basqa da jurnalister aytıladı. Olardıñ arasında ötken jılı qazanda pışaqpen qarulanğan er adam şabuılınan zardap şekken «Eho Moskvı» bas redaktorınıñ orınbasarı Tat'yana Fel'gengauer bar. Reseylik BAQ onı AQŞ müddesi üşin jwmıs istedi dep ayıptağannan keyin qastandıq jasalğan. Time sonday-aq, Kievtegi «Novaya gazeta» basılımınıñ bwrınğı jurnalisi Arkadiya Babçenkonı da atadı. Mamırda ol Ukraina qauipsizdik qızmetiniñ arnayı operaciyasına qatıstı. Ukraina qauipsizdik qızmeti men Babçenkonıñ özi bwl qastandıqtı reseylik biliktiñ qatısuımen wyımdastırılğan dep mälimdedi.

Time: Ötkenge şolu

Bıltır «Jıl adamı» retinde twrmıstıq zorlıq-zombılıqtıñ nemese äleumettik teñsizdiktiñ qwrbandarı bolğan äyelder tanıldı. #MeToo heştegimen ötkizilgen akciya ğalamtor arqılı ülken tanımaldıqqa ie boldı.

Jurnaldıñ dästürge aynalğan qwrmetti atağı alğaş ret 1927 jılı berildi jäne bastapqıda «Jıldıñ üzdik er adamı» dep ataldı. Al 2011 jılı jurnal Arab kökteminiñ älem üşin mänin atap ötip, osı köteriliske şıqqandardı «Jıl adamı» dep jariyaladı.

"The Qazaq Times"