Amerikalıq Time jurnalı 16 jastağı ekobelsendi Greta Tunbergti «Jıl adamı» dep atadı. Şved oquşısı Tunberg sayasatkerlerdiñ klimattıñ özgerui mäselesine män berui üşin ötkizilgen akciyalardıñ wyımdastıruşısı retinde tanılğan.

Sonımen qatar, atalğan nominaciya ümitkerleriniñ qatarında ümitkerleriniñ tiziminde AQŞ ökilder palatasınıñ spikeri Nensi Pelosi, AQŞ prezidenti Donal'd Tramp, Trampqa impiçment jariyalau isine türtki bolğan şağımdı tüsirgen arnayı qızmet ökilderi jäne Gonkongtağı qarsılıq akciyalarınıñ qatısuşıları da bolğan.

Greta Tunberg ötken jılı oquşılar ereuilin wyımdastırıp, köpşilikke tanıla bastadı. Onıñ bastamasımen Şveciyada oquşılar jwma küni sabaqtıñ ornına klimattıq özgeristermen küreske şaqıratın akciya ötkizgen. Biıl bwl qozğalıs damıp, älemniñ ondağan elinde qoldau taptı. İri kölemde ötken tabiğattı qorğau akciyalarına milliondağan adam qatıstı.

Jurnal redakciyası Tunbergtiñ klimattıñ özgeruine qarsı küresken eñbegin ğana emes, özge elderdegi qatarlastarına ülgi bolıp, olardı qoğamdıq ispen aynalısuğa itermelegenin da atap ötken.

Time: Ötkenge şolu

Eki jıl bwrın «Jıl adamı» retinde twrmıstıq zorlıq-zombılıqtıñ nemese äleumettik teñsizdiktiñ qwrbandarı bolğan äyelder tanıldı. #MeToo heştegimen ötkizilgen akciya ğalamtor arqılı ülken tanımaldıqqa ie bolğan. Bıltır üzdikter qatarında kolumnits Jamal Haşoggi, filippindik oppoziciyalıq portal redaktorı Mariya Ressa, M'yanmadağı rohindja mwsılmandarına qatıstı zorlıq-zombılıqtı tergegeni üşin sottalğan «Reuters» agenttiginiñ jurnalisteri Va Lon jäne K'ya So, sonday-aq qarulı qaqtığıstan qaza tapqan amerikandıq «Capital Gazette» redakciyasınıñ wjımı kirdi.

Jurnaldıñ dästürge aynalğan qwrmetti atağı alğaş ret 1927 jılı berildi jäne bastapqıda «Jıldıñ üzdik er adamı» dep ataldı. Al 2011 jılı jurnal Arab kökteminiñ älem üşin mänin atap ötip, osı köteriliske şıqqandardı «Jıl adamı» dep jariyaladı.

"The Qazaq Times"