امەريكالىق Time جۋرنالى «جىل ادامى» اتاعىنا لايىقتى جۋرناليستەردى اتادى. ولاردىڭ ءبىرى – كولۋمنيست، «Washington Post» باسىلىمىنىڭ ءتىلشىسى جامال حاشوگگي.

ۇزدىكتەر قاتارىندا فيليپپيندىك وپپوزيتسيالىق پورتال رەداكتورى ماريا رەسسا، ميانماداعى روحيندجا مۇسىلماندارىنا قاتىستى زورلىق-زومبىلىقتى تەرگەگەنى ءۇشىن سوتتالعان «Reutەrs» اگەنتتىگىنىڭ جۋرناليستەرى ۆا لون جانە كيا سو، سونداي-اق قارۋلى قاقتىعىستان قازا تاپقان امەريكاندىق «Capital Gazette» رەداكتسياسىنىڭ ۇجىمى كىردى. Time وسى اتالعان تىلشىلەردى «الەم ساقشىلارى» دەپ اتادى. باسىلىم پورتالىندا «ولار ەشبىر قاۋىپ-قاتەرگە قاراماستان، ادىلدىك ىزدەگەنى، ناقتى فاكتىلەردى تاپقانى ءۇشىن جانە ماماندىعىنا ادال بولىپ، باتىلدىق تانىتقانى ءۇشىن جىل ادامى بولۋعا لايىقتى» دەلىنگەن.

جاقىندا جاريالانعان «جىل ادامى» اتاعىنان ۇمىتكەرلەر تىزىمىندە اقش پرەزيدەنتى دونالد ترامپ، اقش-تىڭ ارنايى پروكۋرورى روبەرت ميۋللەر، رەسەي پرەزيدەنتى ۆلاديمير پۋتين، بريتانيا حانزاداسى گارري مەن گەرتسوگينيا مەگان بولعان.

«الەم ساقشىلارى»

  • ساۋد ارابيالىق ءتىلشى، «Washington Post» گازەتىنىڭ شولۋشىسى مۇحامەد جامال حاشوگگي ءوزىنىڭ سىني زەرتتەۋ، ماقالالارىمەن تانىلعان. 2 قازاندا ول ىستامبۇلداعى ساۋد ارابياسى كونسۋلدىعىنا بارعان سوڭ، ءىزىم-عايىم جوعالىپ كەتتى. باستاپقىدا ساۋديالىق بيلىك ءجۋرناليستىڭ ءولىمى فاكتىسىن جوققا شىعاردى، الايدا 20 قازاندا ەلدىڭ باس پروكۋراتۋراسى حاشوگگيدىڭ توبەلەس كەزىندە قازا بولعانىن حابارلادى. بىرنەشە كۇننەن كەيىن حاشوگگيدىڭ قاساقانا ولتىرىلگەنى انىقتالدى.

ساۋديالىق جۋرناليست جامال حاشوگگي. فوتو: www.bbc.com

جاقىندا تۇركيا پرەزيدەنتى اكىمشىلىگىنىڭ جۇرتشىلىقپەن بايلانىس باسقارماسىنىڭ باسشىسى فاحرەتتين التۋن ىستامبۇلداعى ساۋد ارابياسىنىڭ باس كونسۋلى موحاممەد الوتايبي ءجۋرناليستىڭ قازاسىنا تىكەلەي قاتىستى دەپ مالىمدەدى.

  • فيليپپيندەگى وپپوزيتسيالىق پورتال رەداكتورى ماريا رەسسا بۇرىن CNN تەلەارناسىندا جۇمىس ىستەگەن. 2012 جىلى ول فيليپپين پرەزيدەنتى رودريگو دۋتەرتەنىڭ ادىلەتسىزدىگىن اشكەرەلەۋگە ارنالعان سىني ماقالالاردان تۇراتىن تانىمال «Rappler» جاڭالىقتار پورتالىن اشتى.

    فوتو: cnn.com

  • ۆا لون مەن كيا – ميانماداعى جاعدايلاردى زەرتتەۋمەن اينالىسقان «Reutەrs» اگەنتتىگىنىڭ تىلشىلەرى. قىركۇيەكتە ميانما سوتى قوس تىلشىگە روحيندجا مۇسىلماندارى تۋرالى ماتەريالدارمەن جۇمىس ىستەۋ كەزىندە مەملەكەتتىك قۇپيا تۋرالى زاڭدى بۇزعانى ءۇشىن 7 جىلعا باس بوستاندىعىنان ايىرۋ تۋرالى ۇكىم شىعاردى.

    فوتو: cnn.com

  • مەريلەند شتاتىنداعى «Capital Gazette» گازەتىنىڭ ءتورت ءجۋرناليسى قارۋلى ەر ادامنىڭ شابۋىلىنان قازا تاپتى. كەيىننەن شابۋىل جاساعان ادامنىڭ بۇرىن گازەتكە قارسى سوتتا جەڭىلىس تاپقانى ءۇشىن تىلشىلەردى ادەيى ولتىرگەنى انىقتالدى.

    فوتو: cnn.com

Time ماقالاسىندا «ساقشىلار» جانە «شىندىق ءۇشىن سوعىس» دەگەن اتپەن بيلىكتىڭ قۋدالاۋى نەمەسە شابۋىلدار ناتيجەسىندە زارداپ شەككەن باسقا دا جۋرناليستەر ايتىلادى. ولاردىڭ اراسىندا وتكەن جىلى قازاندا پىشاقپەن قارۋلانعان ەر ادام شابۋىلىنان زارداپ شەككەن «ەحو موسكۆى» باس رەداكتورىنىڭ ورىنباسارى تاتيانا فەلگەنگاۋەر بار. رەسەيلىك باق ونى اقش مۇددەسى ءۇشىن جۇمىس ىستەدى دەپ ايىپتاعاننان كەيىن قاستاندىق جاسالعان. Time سونداي-اق، كيەۆتەگى «نوۆايا گازەتا» باسىلىمىنىڭ بۇرىنعى ءجۋرناليسى اركاديا بابچەنكونى دا اتادى. مامىردا ول ۋكراينا قاۋىپسىزدىك قىزمەتىنىڭ ارنايى وپەراتسياسىنا قاتىستى. ۋكراينا قاۋىپسىزدىك قىزمەتى مەن بابچەنكونىڭ ءوزى بۇل قاستاندىقتى رەسەيلىك بيلىكتىڭ قاتىسۋىمەن ۇيىمداستىرىلعان دەپ مالىمدەدى.

Time: وتكەنگە شولۋ

بىلتىر «جىل ادامى» رەتىندە تۇرمىستىق زورلىق-زومبىلىقتىڭ نەمەسە الەۋمەتتىك تەڭسىزدىكتىڭ قۇرباندارى بولعان ايەلدەر تانىلدى. #MeToo حەشتەگىمەن وتكىزىلگەن اكتسيا عالامتور ارقىلى ۇلكەن تانىمالدىققا يە بولدى.

جۋرنالدىڭ داستۇرگە اينالعان قۇرمەتتى اتاعى العاش رەت 1927 جىلى بەرىلدى جانە باستاپقىدا «جىلدىڭ ۇزدىك ەر ادامى» دەپ اتالدى. ال 2011 جىلى جۋرنال اراب كوكتەمىنىڭ الەم ءۇشىن ءمانىن اتاپ ءوتىپ، وسى كوتەرىلىسكە شىققانداردى «جىل ادامى» دەپ جاريالادى.

"The Qazaq Times"