Foto: media.ws

Irannıñ jaña zımırandarı Europa Odağına aytarlıqtay qauip töndiredi.

Die Welt nemis basılımınıñ habarlauınşa, jaña zımırandar Europanıñ oñtüstik-şığısındağı elderge deyin jete aladı. Tehran 2018 jılı on üş ret orta jäne jaqın qaşıqtıqqa wşatın ballistikalıq zımırandardı sınaqtan ötkizgen. Bwl körsetkiş aldıñğı jılmen salıstırğanda eki esege artıq bolğandıqtan, Europalıq arnayı qızmetteri Iran zımırandarınıñ EO territoriyasına qauipti degen şeşimge kelgen. Al resmi Tehran BWW Qauipsizdik keñesiniñ erejesin bwzbaytının jäne jıl sayınğı sınaqtardıñ qauipsizdik pen qorğanıs maqsatında ötetinin aytqan.

Biıl AQŞ Irandı yadorlıq kelisimdi bwzdı dep ayıptap, 2015 jılı jasalğan köpjaqtı yadrolıq kelisimnen şıqtı. 5 qaraşadan bastap AQŞ tarapı Iranğa qarsı sankciyalardı qayta qalpına keltirdi. Uaşington atalğan sankciyalar Irannıñ «dwşpandıq is-äreketterine», onıñ işinde kiberşabuıldarğa jäne ballistikalıq zımırandardı sınauğa qarsılıq esebinde salınatının ayttı. Sonımen qatar, Tehranğa Tayau Şığıstağı radikaldı toptarğa qoldau körsetuge kedergi jasau maqsatında jüzege asadı.

AQŞ-tıñ Iranğa qarsı salınğan ekinşi sankciyalarınıñ tiziminde Irandı tölemder ötkizu men bankaralıq aqparat almasu jüyesinen ajıratu qarastırılğan. Bwl şara tek qana Iran emes, osı elmen mwnay eksportın jäne qarjılıq baylanıs jasaytın memleketterge de qatıstı.Sankciyalıq tizimde 700-den astam jeke twlğa, wyımdar men kompaniyalar, onıñ işinde eldiñ negizgi bankteri, mwnay eksporttauşıları men keme qatınası kompaniyaları da bar.

"The Qazaq Times"