فوتو: media.ws

يراننىڭ جاڭا زىمىراندارى ەۋروپا وداعىنا ايتارلىقتاي قاۋىپ توندىرەدى.

Die Welt نەمىس باسىلىمىنىڭ حابارلاۋىنشا، جاڭا زىمىراندار ەۋروپانىڭ وڭتۇستىك-شىعىسىنداعى ەلدەرگە دەيىن جەتە الادى. تەھران 2018 جىلى ون ءۇش رەت ورتا جانە جاقىن قاشىقتىققا ۇشاتىن بالليستيكالىق زىمىرانداردى سىناقتان وتكىزگەن. بۇل كورسەتكىش الدىڭعى جىلمەن سالىستىرعاندا ەكى ەسەگە ارتىق بولعاندىقتان، ەۋروپالىق ارنايى قىزمەتتەرى يران زىمىراندارىنىڭ ەو تەرريتورياسىنا قاۋىپتى دەگەن شەشىمگە كەلگەن. ال رەسمي تەھران بۇۇ قاۋىپسىزدىك كەڭەسىنىڭ ەرەجەسىن بۇزبايتىنىن جانە جىل سايىنعى سىناقتاردىڭ قاۋىپسىزدىك پەن قورعانىس ماقساتىندا وتەتىنىن ايتقان.

بيىل اقش يراندى يادورلىق كەلىسىمدى بۇزدى دەپ ايىپتاپ، 2015 جىلى جاسالعان كوپجاقتى يادرولىق كەلىسىمنەن شىقتى. 5 قاراشادان باستاپ اقش تاراپى يرانعا قارسى سانكتسيالاردى قايتا قالپىنا كەلتىردى. ۋاشينگتون اتالعان سانكتسيالار يراننىڭ «دۇشپاندىق ءىس-ارەكەتتەرىنە»، ونىڭ ىشىندە كيبەرشابۋىلدارعا جانە بالليستيكالىق زىمىرانداردى سىناۋعا قارسىلىق ەسەبىندە سالىناتىنىن ايتتى. سونىمەن قاتار، تەھرانعا تاياۋ شىعىستاعى راديكالدى توپتارعا قولداۋ كورسەتۋگە كەدەرگى جاساۋ ماقساتىندا جۇزەگە اسادى.

اقش-تىڭ يرانعا قارسى سالىنعان ەكىنشى سانكتسيالارىنىڭ تىزىمىندە يراندى تولەمدەر وتكىزۋ مەن بانكارالىق اقپارات الماسۋ جۇيەسىنەن اجىراتۋ قاراستىرىلعان. بۇل شارا تەك قانا يران ەمەس، وسى ەلمەن مۇناي ەكسپورتىن جانە قارجىلىق بايلانىس جاسايتىن مەملەكەتتەرگە دە قاتىستى.سانكتسيالىق تىزىمدە 700-دەن استام جەكە تۇلعا، ۇيىمدار مەن كومپانيالار، ونىڭ ىشىندە ەلدىڭ نەگىزگى بانكتەرى، مۇناي ەكسپورتتاۋشىلارى مەن كەمە قاتىناسى كومپانيالارى دا بار.

"The Qazaq Times"