Foto: www.bbc.com

AQŞ prezidenti Donal'd Tramp Argentinada Vladimir Putinmen kezdespeuim mümkin dep mälimdedi. Bwğan Reseydiñ Ukrainağa kezekti märte körsetken agressorlıq sayasatı sebep bolğan.

Osığan deyin Aq üydiñ baspasöz hatşısı Sara Sanders Tramp pen Putin apta soñında Buenos-Ayres qalasında ötetin G-20 sammiti ayasında kezdesetinin aytqan. Sayasi mañızdı jiında eki el basşısı Ukraina men Süriyadağı jağday, yadrolıq qaru mäselelerin talqılaudı josparlağan. Sonımen qatar, Tramp Argentinada Putinnen basqa Germaniya kancleri Angela Merkel'men, Japoniya prem'er-ministri Sindzo Abemen jäne Qıtay törağası Şi Jinpiñmen kezdesudi josparlap otır.

Donal'd Tramp «Washington Post» gazetine bergen swhbatında Kerç' bwğazındağı oqiğa turalı Wlttıq Qauipsizdik Keñesiniñ tolıq esebin kütetinin mälimdedi. Öz sözinde ol: «Mümkin, men bwl kezdesudi ötkizbeymin. Mağan Resey agressiyası mülde wnamaydı», – dedi.

Reseydiñ Kerç' bwğazındağı Ukrainamen qaqtığısı Senattıñ qarulı küşter jönindegi komissiyasınıñ otırısında talqığa tüsti. AQŞ senatorı Djin Şahin bwl oqiğanı Resey jürgizgen soğıs dep atadı, al Meyzi Hirono Amerika tarapı Reseydiñ arandatuşılıq äreketterine qatıstı jaña sankciyalar engizu kerektigin eskertti.

Qorğanıs ministriniñ sayasat mäseleleri jönindegi bwrınğı orınbasarı Erik Edel'man. Foto: lobelog.com

Komissiya otırısında Qorğanıs ministriniñ sayasat mäseleleri jönindegi bwrınğı orınbasarı Erik Edel'man Resey AQŞ pen basqa da odaqtastarğa qarsı sayasi soğıstı kündelikti rejimde jürgizip kele jatqanın mälimdedi. BBC-ge swhbat bergen Edel'man Reseymen qatar Qıtay da adam qwqıqtarın taptaudı alğa qoyıp, älemge eşteñe bolmağanday keyip tanıtatının ayttı. Onıñ sözinşe, eger Resey Kerç' bwğazında köpir salu arqılı Ukrainağa basqınşılıq jasap, halıqaralıq keme qatınasın toqtatsa, sol siyaqtı QHR Oñtüstik Qıtay teñizinde jasandı araldar salıp, olardı äskeri nısandarğa aynaldırıp keledi. «Bwl degenimiz eki eldiñ älemge qarsı birlesken äreketi», – dep atap ötti Edel'man. Sol sebepti AQŞ Reseyge tosqauıl bolu üşin äskeri is-qimıl men artilleriyanı, sonday-aq äskerdegi kibertehnologiyalardı damıtuı qajet.

Jalpı Mäskeu men Kiev teketiresine qatıstı BWW Qauipsizdik keñesiniñ otırısında AQŞ-tıñ twraqtı ökili Nikki Heyli Reseydiñ kezekti agressiyalıq äreketin qauipti eskalaciya jäne halıqaralıq qwqıqtıñ bwzıluı dep bağa berdi. Al memlekettik hatşı Mayk Pompeo: «AQŞ Reseydiñ agressivti äreketterin ayıptaydı. Ukrainağa kemelerdi qaytarıp, wstalğan ekipaj müşelerin bosatudı, Ukrainanıñ egemendigi men onıñ aumaqtıq twtastığın qwrmetteudi Reseyden talap etemiz», – dep mälimdedi.

Bolğan iske qatıstı Vladimir Putin, äzirşe, jaq aşqan joq. Al onıñ baspasöz hatşısı Dmitriy Peskov Resey prezidenti Ukrainamen arada bolğan janjal turalı Argentinada ötetin «Ülken jiırmalıqtıñ» sammitinde mälimdeytinin ayttı. Älemniñ ekonomikası quattı jiırma eli basşılarınıñ sammiti 30 qaraşa men 1 jeltoqsan aralığında ötedi.

"The Qazaq Times"