«ماعان بۇل اگرەسسيا مۇلدە ۇنامايدى»: ترامپ كەرچ بۇعازىنداعى وقيعاعا قاتىستى رەسەيدى سىنعا الدى

اقش پرەزيدەنتى دونالد ترامپ ارگەنتينادا ۆلاديمير پۋتينمەن كەزدەسپەۋىم مۇمكىن دەپ مالىمدەدى. بۇعان رەسەيدىڭ ۋكرايناعا كەزەكتى مارتە كورسەتكەن اگرەسسورلىق ساياساتى سەبەپ بولعان.

وسىعان دەيىن اق ءۇيدىڭ ءباسپاسوز حاتشىسى سارا ساندەرس ترامپ پەن پۋتين اپتا سوڭىندا بۋەنوس-ايرەس قالاسىندا وتەتىن G-20 ءسامميتى اياسىندا كەزدەسەتىنىن ايتقان. ساياسي ماڭىزدى جيىندا ەكى ەل باسشىسى ۋكراينا مەن سۇرياداعى جاعداي، يادرولىق قارۋ ماسەلەلەرىن تالقىلاۋدى جوسپارلاعان. سونىمەن قاتار، ترامپ ارگەنتينادا پۋتيننەن باسقا گەرمانيا كانتسلەرى انگەلا مەركەلمەن، جاپونيا پرەمەر-ءمينيسترى سيندزو ابەمەن جانە قىتاي توراعاسى شي جينپيڭمەن كەزدەسۋدى جوسپارلاپ وتىر.

دونالد ترامپ «Washington Post» گازەتىنە بەرگەن سۇحباتىندا كەرچ بۇعازىنداعى وقيعا تۋرالى ۇلتتىق قاۋىپسىزدىك كەڭەسىنىڭ تولىق ەسەبىن كۇتەتىنىن مالىمدەدى. ءوز سوزىندە ول: «مۇمكىن، مەن بۇل كەزدەسۋدى وتكىزبەيمىن. ماعان رەسەي اگرەسسياسى مۇلدە ۇنامايدى»، – دەدى.

رەسەيدىڭ كەرچ بۇعازىنداعى ۋكراينامەن قاقتىعىسى سەناتتىڭ قارۋلى كۇشتەر جونىندەگى كوميسسياسىنىڭ وتىرىسىندا تالقىعا ءتۇستى. اقش سەناتورى دجين شاحين بۇل وقيعانى رەسەي جۇرگىزگەن سوعىس دەپ اتادى، ال مەيزي حيرونو امەريكا تاراپى رەسەيدىڭ ارانداتۋشىلىق ارەكەتتەرىنە قاتىستى جاڭا سانكتسيالار ەنگىزۋ كەرەكتىگىن ەسكەرتتى.

قورعانىس ءمينيسترىنىڭ ساياسات ماسەلەلەرى جونىندەگى بۇرىنعى ورىنباسارى ەريك ەدەلمان. فوتو: lobelog.com

كوميسسيا وتىرىسىندا قورعانىس ءمينيسترىنىڭ ساياسات ماسەلەلەرى جونىندەگى بۇرىنعى ورىنباسارى ەريك ەدەلمان رەسەي اقش پەن باسقا دا وداقتاستارعا قارسى ساياسي سوعىستى كۇندەلىكتى رەجيمدە جۇرگىزىپ كەلە جاتقانىن مالىمدەدى. BBC-گە سۇحبات بەرگەن ەدەلمان رەسەيمەن قاتار قىتاي دا ادام قۇقىقتارىن تاپتاۋدى العا قويىپ، الەمگە ەشتەڭە بولماعانداي كەيىپ تانىتاتىنىن ايتتى. ونىڭ سوزىنشە، ەگەر رەسەي كەرچ بۇعازىندا كوپىر سالۋ ارقىلى ۋكرايناعا باسقىنشىلىق جاساپ، حالىقارالىق كەمە قاتىناسىن توقتاتسا، سول سياقتى قحر وڭتۇستىك قىتاي تەڭىزىندە جاساندى ارالدار سالىپ، ولاردى اسكەري نىساندارعا اينالدىرىپ كەلەدى. «بۇل دەگەنىمىز ەكى ەلدىڭ الەمگە قارسى بىرلەسكەن ارەكەتى»، – دەپ اتاپ ءوتتى ەدەلمان. سول سەبەپتى اقش رەسەيگە توسقاۋىل بولۋ ءۇشىن اسكەري ءىس-قيمىل مەن ارتيللەريانى، سونداي-اق اسكەردەگى كيبەرتەحنولوگيالاردى دامىتۋى قاجەت.

جالپى ماسكەۋ مەن كيەۆ تەكەتىرەسىنە قاتىستى بۇۇ قاۋىپسىزدىك كەڭەسىنىڭ وتىرىسىندا اقش-تىڭ تۇراقتى وكىلى نيككي حەيلي رەسەيدىڭ كەزەكتى اگرەسسيالىق ارەكەتىن قاۋىپتى ەسكالاتسيا جانە حالىقارالىق قۇقىقتىڭ بۇزىلۋى دەپ باعا بەردى. ال مەملەكەتتىك حاتشى مايك پومپەو: «اقش رەسەيدىڭ اگرەسسيۆتى ارەكەتتەرىن ايىپتايدى. ۋكرايناعا كەمەلەردى قايتارىپ، ۇستالعان ەكيپاج مۇشەلەرىن بوساتۋدى، ۋكراينانىڭ ەگەمەندىگى مەن ونىڭ اۋماقتىق تۇتاستىعىن قۇرمەتتەۋدى رەسەيدەن تالاپ ەتەمىز»، – دەپ مالىمدەدى.

بولعان ىسكە قاتىستى ۆلاديمير پۋتين، ازىرشە، جاق اشقان جوق. ال ونىڭ ءباسپاسوز حاتشىسى دميتري پەسكوۆ رەسەي پرەزيدەنتى ۋكراينامەن ارادا بولعان جانجال تۋرالى ارگەنتينادا وتەتىن «ۇلكەن جيىرمالىقتىڭ» سامميتىندە مالىمدەيتىنىن ايتتى. الەمنىڭ ەكونوميكاسى قۋاتتى جيىرما ەلى باسشىلارىنىڭ ءسامميتى 30 قاراشا مەن 1 جەلتوقسان ارالىعىندا وتەدى.

"The Qazaq Times"