Foto: Sputnik International

Qıtayğa qarastı Şınjañnıñ Hotan aymağında tağı da qandı oqiğa boldı dep habarlaydı Täuelsiz-Aziya radiosınıñ resmi saytı (Radio Free Asia / rfa.org ). Oqiğa 14 aqpan küni sol jerdegi sauda bazarında, jergilikti uaqıtpen 17:00-de orın alğan. Qolına pışaq wstağan üş azamat bazardağı 5 adamdı öltirip, 5 adamdı jaralağan. Atalğan oqiğağa baylanıstı jergilikti policeyler qalanı jäne mañındağı qala, audandardı qatañ baqılauğa alğan.

Täuelsiz Aziya radiosınıñ habarına qarağanda, jergilikti ükimet pışaq wstağan üş şabuılşınıñ 5 adamdı öltirip, 5 adamdı jaralağanın ğana habarlap, olardıñ kimder ekenin, qılmıs tudıru maqsatı turalı eşqanday mälimet bermey otır. Oqiğa saldarın jeleu etip Hotan aymağına qarastı barlıq audan, qalalardı qatañ rejimde wstap otır dep habarlaydı RFA saytı.

Sayttıñ jergilikti tilşisi oqiğa tuılğan orındağı barlıq taraularğa habarlassa da, qılmıs tudıruşılar turalı mälimet ala almağan. Tek twrğındardıñ jüris-twrısı qatañ şektelgeni turalı ğana mälimet ala alğan. Jergilikti ükimet organdarı atalğan oqiğa turalı mälimet beruden bas tartqan. Sayt jurnalisti jalğastı oqu orındarı men ükimettik emes wyımdardıñ ökiline tilşilik jasağanda, olar özderiniñ jüris-twrıs, barlıq äreketteriniñ qatañ şektelgenin, üy men qızmet orınınan rwhsatsız şığuğa tiım salınğanın, barlıq köşe boyında qarulı policeyler azamattardıñ jeke kuälikteri men zattarın tekserip jatqanın aytadı.

Qazir Hotan aymağı Qıtay biligine qarsılıq eñ jii tuılıp jatqan aymaq sanaladı. Amerikadağı Wyğır birlestiginiñ ökili Ilşat Asannıñ RFA jurnalistine bergen jauabında: Qıtay biligi qazir Hotan öñirine bar zwlımdığın jasap jatır. Sebebi, Hotan aymağı wyğırlardıñ mädenieti men küşi şoğırlanğan eñ soñğı aymaq bolıp twr. Qıtay ükimeti sol üşin de bwl jerdegi halıqqa barınşa qısım tüsirip, olardı küşpen janıştauda. Qarsılıqtı basudıñ bir ğana jolı bar. Ol – qıtay biligi 2009 jılğı 5 şilde oqiğasınıñ sebebin anıqtap, sol kezde jazıqsız ölgen wyğır balaları men äli künge iz-tozsız joğalğan wyğır azamattarın deregin anıqtap, ata-anasına, tuğan-tuısına tölem tölesin. Türmedegi wyğır azamattarın bosatsın. Sonda ğana qarsılıq bäseñdeydi. Bolmasa halıqta da  basqa talğam joq», – degen pikirin aytqan.

Şınjañnıñ wyğırlar qonıstanğan oñtüstik aymaqtarında qıtay biliginiñ tegeurini ötken wyğırlardıñ qarsılığı jiileude. Bwl soñğı eki ay işindegi üşinşi retki qandı şabuıl oqiğası. Älemdegi barlıq wyğırlar jer-jerde qıtay biliginiñ wyğırlarğa tüsirip otırğan qısımın aytıp, şağımdanuda. 11 aqpanda Japoniya parlamentine wyğır qozğalısınıñ basşısı atanıp jürgen Räbiya  Qadır  wyğırlardıñ jağdayınan mälimdeme jasağan. Bwl jinalısqa Japoniya prem'er-ministriniñ kömekşisi de qatısqan bolatın. Älemdegi wyğır birlestigi barlıq halıqaralıq wyımdardan wyğır teñdigin swrauda. Alayda, halıqaralıq wyımdar da, özge elder de, «Ülken Qıtay» sayasatına jol beruden asa almay twr.

“The Qazaq Times”