AQŞ-tıñ bombalauşı wşaqtarı Oñtüstik Qıtay teñizinde operaciya jasadı

AQŞ Teñip armiyasınıñ «Reygan» wşaq tasımaldauşı kemesiniñ Gonkongke baruınıñ aldında, yağni osıdan bir kün bwrın, AQŞ Äue küşteriniñ eki birdey B-52 strategiyalaq bombalauşı wşaqtarı Oñtüstik Qıtay teñizinde şarlau operaciyasın ötkizdi. AQŞ qorğanıs tarauları bwl äreketin atalğan daulı su aydınındağı erkin navigaciyanı qorğau jäne keñistigindegi wşu joldarınıñ jalpığa birdeyligin qorğau dep tüsindirdi.

AQŞ-tıñ Tınıq mwhit äskeri qolbasşılıq Bas ştabı taratqan mälimetterde de B-52 bombalauşı wşaqtarınıñ Oñtüstik Qıtay teñizinde jattığu operaciyasın ötkizetinin rastağan. Bwl auır twrpattağı bombalauşı äskeri tehnikalar Oñtüstik Qıtay teñizindegi äskeri jattığuğa qatısu üşin, AQŞ-tıñ Guam aralındağı Anderson Air Force Base-den bazasınan wşıp şıqqan.

AQŞ äue küşteri jasağan mälimette, bwl äskeri äreketteri halıqaralıq qwqıqtar men Qwrama Ştattardıñ Tınıq mwhit aymağınıñ erkin jäne aşıq boluın wzaq merzimdi qamtamasız etu mindetine say keletini eskertilgen.

AQŞ äreketinen keyin Beyjiñ tarabı jedel mälimdeme jasap, kezekti äskeri operaciyalardı ayıptadı. Qıtay ükimetiniñ pikirinde, Qwrama Ştat osınday äreketter arqılı Oñtüstik Qıtay teñizinde militarizaciya jasauğa tırısıp otır.

Bir kün bwrın Qwrama Ştat qarulı küşteri taratqan habarda, «Reygan» wşaq tasımal kemesi Filippin sularında öziniñ jauıngerlik kemeler qosınımen mindet atqarıp jürgenin aytqan edi.

AQŞ pen Qıtaydıñ teñizdegi bäsekelestigi osınday äreketter arqılı kün sayın şielenisti jağdayğa qaray damıp bara jatır. Qıtay Oñtüstik Qıtay teñiziniñ basım köp aumağın öziniki retinde moyındatqısı keledi. Alayda, oğan atalğan teñizben şektesip otırğan altı memleket kelispeydi. Qwrama Ştat pen Australiya Ündi-Tınıq mwhittağı erkin navigaciyanı, halıqaralıq aşıq su jolın qorğau maqsatında Qıtaydı tizgindep wstauğa tırısadı.

“The Qazaq Times”