اقش-تىڭ بومبالاۋشى ۇشاقتارى وڭتۇستىك قىتاي تەڭىزىندە وپەراتسيا جاسادى

اقش تەڭىp ارمياسىنىڭ «رەيگان» ۇشاق تاسىمالداۋشى كەمەسىنىڭ گونكونگكە بارۋىنىڭ الدىندا، ياعني وسىدان ءبىر كۇن بۇرىن، اقش اۋە كۇشتەرىنىڭ ەكى بىردەي B-52 ستراتەگيالاق بومبالاۋشى ۇشاقتارى وڭتۇستىك قىتاي تەڭىزىندە شارلاۋ وپەراتسياسىن وتكىزدى. اقش قورعانىس تاراۋلارى بۇل ارەكەتىن اتالعان داۋلى سۋ ايدىنىنداعى ەركىن ناۆيگاتسيانى قورعاۋ جانە كەڭىستىگىندەگى ۇشۋ جولدارىنىڭ جالپىعا بىردەيلىگىن قورعاۋ دەپ ءتۇسىندىردى.

اقش-تىڭ تىنىق مۇحيت اسكەري قولباسشىلىق باس شتابى تاراتقان مالىمەتتەردە دە B-52 بومبالاۋشى ۇشاقتارىنىڭ وڭتۇستىك قىتاي تەڭىزىندە جاتتىعۋ وپەراتسياسىن وتكىزەتىنىن راستاعان. بۇل اۋىر تۇرپاتتاعى بومبالاۋشى اسكەري تەحنيكالار وڭتۇستىك قىتاي تەڭىزىندەگى اسكەري جاتتىعۋعا قاتىسۋ ءۇشىن، اقش-تىڭ گۋام ارالىنداعى Anderson Air Force Base-دەن بازاسىنان ۇشىپ شىققان.

اقش اۋە كۇشتەرى جاساعان مالىمەتتە، بۇل اسكەري ارەكەتتەرى حالىقارالىق قۇقىقتار مەن قۇراما شتاتتاردىڭ تىنىق مۇحيت ايماعىنىڭ ەركىن جانە اشىق بولۋىن ۇزاق مەرزىمدى قامتاماسىز ەتۋ مىندەتىنە ساي كەلەتىنى ەسكەرتىلگەن.

اقش ارەكەتىنەن كەيىن بەيجىڭ تارابى جەدەل مالىمدەمە جاساپ، كەزەكتى اسكەري وپەراتسيالاردى ايىپتادى. قىتاي ۇكىمەتىنىڭ پىكىرىندە، قۇراما شتات وسىنداي ارەكەتتەر ارقىلى وڭتۇستىك قىتاي تەڭىزىندە ميليتاريزاتسيا جاساۋعا تىرىسىپ وتىر.

ءبىر كۇن بۇرىن قۇراما شتات قارۋلى كۇشتەرى تاراتقان حاباردا، «رەيگان» ۇشاق تاسىمال كەمەسى فيليپپين سۋلارىندا ءوزىنىڭ جاۋىنگەرلىك كەمەلەر قوسىنىمەن مىندەت اتقارىپ جۇرگەنىن ايتقان ەدى.

اقش پەن قىتايدىڭ تەڭىزدەگى باسەكەلەستىگى وسىنداي ارەكەتتەر ارقىلى كۇن سايىن شيەلەنىستى جاعدايعا قاراي دامىپ بارا جاتىر. قىتاي وڭتۇستىك قىتاي تەڭىزىنىڭ باسىم كوپ اۋماعىن وزىنىكى رەتىندە مويىنداتقىسى كەلەدى. الايدا، وعان اتالعان تەڭىزبەن شەكتەسىپ وتىرعان التى مەملەكەت كەلىسپەيدى. قۇراما شتات پەن اۋستراليا ءۇندى-تىنىق مۇحيتتاعى ەركىن ناۆيگاتسيانى، حالىقارالىق اشىق سۋ جولىن قورعاۋ ماقساتىندا قىتايدى تىزگىندەپ ۇستاۋعا تىرىسادى.

“The Qazaq Times”