Amerika Qwrama Ştattarında Kongreske aralıq saylau ötip jatır. Kezekti saylau nätijesinde Senat joğarı palatasınıñ üşten bir böligi jäne tömengi palatanıñ barlıq qwramı özgeredi.

AQŞ prezidenti Donal'd Tramp: «Eger sizder elimizge migranttar kerueni ağılıp, qılmıstardıñ artqanın qalasañızdar demokrattarğa dauıs berseñizder boladı. Demokrattardıñ maqsatı – biıldan qaldırmay şekaranı aşu. Olar jan-jaqtan migranttardı elge şaqırıp otır. Zañsız migranttardıñ sanı artıp, artı twraqsızdıqqa äkep soqtı. Biz bwğan jol bere almaymız. Demek, aralıq saylau osı mäselelerdi şeşedi. Eger şekaramız berik, wlttıq qauipsizdik mığım jäne qoğamdıq tärtiptiñ saqtalğanın qalasañızdar respublikalıqtardı tañdañızdar».

Kongreske saylau bastalğalı beri, AQŞ prezidenti Donal'd Tramptıñ reytingisi 44%-ğa artqan. Foto: voanews.com

Osı saylau arqılı amerikalıqtar tömengi palatanıñ qwramın tügeldey jañartıp, jaña gubernatorlardı tañdaydı. Däl qazir Kongreste Tramp äkimşiligi – respublikalıqtar basımdıqqa ie. Demokrattar ta özderiniñ jeñiske jetetine senimdi. Ol üşin top ökilderi Senattan 2 jäne ökilder palatasınan 23 orınğa ie boluı tiis. Osı rette AQŞ-tıñ eks-prezidenti Barak Obama: «Key adamdar iri, auqımdı jetistikterdi jay ğana özdiginen bolatın qwbılıs dep sanaydı. Al basqaları älemge äygili etuge tırısadı. Biz bwrınnan adamdardı näsili men tegine qarap bağalamaytınbız. Biraq, näsilşildiktiñ orındalu-orındalmauına eşqanday kepildik joq ekenine köz jetkizdik. Sol sebepti qoğamdağı teñdik üşin ünemi küresu mindet. Birneşe uaqıt köleminde elimiz köptegen iri jetistikterge jetti. Endi elimizdiñ ne qalaytını osı saylauda belgili bolmaq. Halıq osı jolı bwrınğıdan da ayrıqşa belsendilik tanıtıp keledi», – dedi.

Demokrattardıñ köşbasşısı, eks-prezident Barak Obama saylauda jeñiske jetetinine senimdi. Foto: cnbc.com

Jeñisten ümitker respublikalıqtar jäne demokrattar arasındağı jarıs barısında Qwrama Ştattarınıñ prezidenti Donal'd Tramptıñ reytingisi 44%-ğa artqan. Alayda, CNN telearnası jürgizgen aldın-ala saualnama boyınşa, demokrattar üşin eldiñ 55%-dan astamı dauıs beruge qwlşınıs bildirgen. Al SSRS kompaniyasınıñ zertteui boyınşa, Tramp partiyasına halıqtıñ tek 39%-ı senim bildirgen. «The New York Times» basılımında key sarapşılar bwl sayasi şarağa «Donal'd Tramp äkimşiligine qatıstı referendum» dep bağa bergen. Aralıq saylauda respublikalıqtar jeñiske jetse, Tramp äkimşiligi kezekti märte iri basımdıqqa ie boladı.
Ayta keteyik, Amerika üşin mañızı zor aralıq saylauğa 5 milliard dolllar köleminde qarjı jwmsalğan. Sonday-aq, aralıq saylauğa deyin aldın-ala şaralar jürgizilip, AQŞ qwqıq qorğau organdarı saylauşılarğa Resey, Iran jäne basqa da elderdiñ äleumettik jelilerdegi jalğan aqparattarınan saqtanu kerektigin eskertti. Osığan oray Facebook äleumettik jelisi 115-ten astam küdikti jäne feyk akkaunttardı bwğattağan. Joyılğan akkaunttardıñ basım böligi Resey men Iran qoldanuşılarına tän.

Qazirşe respublikalıqtar 143 dauıspen köş bastap twr. Tolıqtay aralıq saylau nätijeleri jaqın arada belgili boladı.

"The Qazaq Times"