Poşta arqılı joldanğan jarılğış. Foto: FBI/BBC.

AQŞ jergilikti uaqıtımen särsenbi küni tañerteñ Demokrattar partiyasınıñ bwrınğı liderleri Barak Obama men Hillari Klintonnıñ meken-jayına joldanğan joldama qaltasınan jarılğış zattar tabıldı. Bwl AQŞ-tıñ aqparat qwraldarın dür silkindirgen oqiğa boldı.

AQŞ basılımdarınıñ aytuınşa, bwnday joldamalardı Demokrattar partiyasınıñ Wlttıq komitettegi bwrınğı törağası Debbi Vasserman-Şul'c te tapsırıp alğan. Al, onıñ atınan tağı bir jarılğış salınğan joldama qaltası bwrınğı bas prokuror Erik Holderdiñ de keñsesine jetken. Biraq, derekteri tolıq körsetilmegendikten «keri jöneltuge» ketken.

Poşta arqılı joldanğan jarılğış zattardı qabıldağandar tek bwlar ğana emes. Demokrattar partiyasınıñ müşesi bolğan jäne lauazımdı qızmettege tağı birneşe adamğa da joldanğan. Al, osığan deyin N'yu-Yorkke jaqın Jorj Sorostıñ üyiniñ janındağı poşta jäşiginen jarılğış tabılğanı habarlanğan bolatın.

Osığan baylanıstı Federaldıq barlau basqarması mälimdeme jasap, bwl aqparattardı rastadı. Äri basqa da lauazımdılardıñ meken-jayına osınday joldamanıñ baruı mümkin ekenin de eskertti. Tekseru nätijelerinde bwl joldamalarda bombanıñ bölşekteri, jarılğış wntaqtardıñ bolğanı mälim bolğan. Bwl oqiğanı anıqtau qazir FBB-nıñ bastı mindeti boldı.

AQŞ-tıñ bwrınğı prezidenti Barak Obama jarılğış salınğan qorapşanı aşpağanın, tipti oğan jaqındamağanın aytqan. Ayta keterligi, Barak Obamanıñ Uaşingtondağı üyi Ivanka Tramptıñ üyne jaqın ornalasqan. Tipti, arası nebarı 2 minuttıq jol ekenin basılımdar eskerte ketken. Al, Hillari Klintonnıñ üyne jarılğış salınğan qorapşa jetkizilgende ol Floridada saparda bolğan. Al, üyinde eks-prezident Bill Klinton bolğan.

Federaldıq barlau basqarması isti tergeudi bastadı. Foto: BBC/AP.

Aq üy bwl şabuıldardı ayıptap, mälimdeme de tarattı. «Jan alğış joldamalardıñ» köbi derlik Demokratiyalıq partiyanıñ Wlttıq komitet törağası Debbi Vasserman-Şul'c atınan joldanğan. 2016 jılı onıñ komitettegi hat almasularınıñ Wikileaks saytına jariyalanıp ketkeni üşin Debbi Vasserman-Şul'c otstavkağa ketken bolatın. Kezekti oqiğağa baylanıstı ol BAQ arqılı alañdauşılığın jetkizdi.

Bwl oqiğa AQŞ-ta 2001 jıldan bergi eñ auqımdı «poşta şabuılı» deuge boladı. 11 qırküyek oqiğasınan keyin Uaşingtondağı keybir kompaniyalarğa jäne kongresmenderdiñ meken-jayına qauipti indettiñ virusı salınğan joldamalar kelip tüsken bolatın. Sol rekti şabuıldan 5 adam qaza bolıp, 17 adam qauipti indetti jwqtırğan edi.

Bwl oqiğanı anıqtau isi de birneşe jılğa sozılğan. Alğaşqı tekseru nätijeleri boyınşa belgili biologiyalıq qaru boyınşa ekspert Stiven Hatfil küdikti retinde atı atalğan. Alayda, tergeu soñında onı ayıpsız dep taptı. Al, küdiktini Bryus Edvards Ivins degen adamdı körsetken. Ol 2008 jılğa deyin barlau qızmetiniñ baqılauında wstaldı, keyin öz-özine qol saldı. Soñında biologiyalıq qaru arqılı jasalğan şabuıldıñ bastı ayıpkeri Bryus Edvards Ivins dep jariyalanğan. Degenmen onıñ maqsatı jäne artında qanday küşterdiñ twrğanı turalı mälimetter Federaldıq barlau basqarmasınıñ qwpiya qwjattarında qala berdi.

Al, kezekti şabuılğa qatıstı äli de naqtı däleldi ayıptar jasalmadı. Alayda, amerikalıq BAQ-ta keybir sarapşılar şabuıldıñ artında şeteldik küşter twrğan boluı mümkin degendi aytadı.

“The Qazaq Times”