باراك وباما مەن حيللاري كلينتون پوشتا ارقىلى جولدانعان جارىلعىش زات تاپسىرىپ الدى

اقش جەرگىلىكتى ۋاقىتىمەن سارسەنبى كۇنى تاڭەرتەڭ دەموكراتتار پارتياسىنىڭ بۇرىنعى ليدەرلەرى باراك وباما مەن حيللاري كلينتوننىڭ مەكەن-جايىنا جولدانعان جولداما قالتاسىنان جارىلعىش زاتتار تابىلدى. بۇل اقش-تىڭ اقپارات قۇرالدارىن ءدۇر سىلكىندىرگەن وقيعا بولدى.

اقش باسىلىمدارىنىڭ ايتۋىنشا، بۇنداي جولدامالاردى دەموكراتتار پارتياسىنىڭ ۇلتتىق كوميتەتتەگى بۇرىنعى توراعاسى دەببي ۆاسسەرمان-شۋلتس تە تاپسىرىپ العان. ال، ونىڭ اتىنان تاعى ءبىر جارىلعىش سالىنعان جولداما قالتاسى بۇرىنعى باس پروكۋرور ەريك حولدەردىڭ دە كەڭسەسىنە جەتكەن. بىراق، دەرەكتەرى تولىق كورسەتىلمەگەندىكتەن «كەرى جونەلتۋگە» كەتكەن.

پوشتا ارقىلى جولدانعان جارىلعىش زاتتاردى قابىلداعاندار تەك بۇلار عانا ەمەس. دەموكراتتار پارتياسىنىڭ مۇشەسى بولعان جانە لاۋازىمدى قىزمەتتەگە تاعى بىرنەشە ادامعا دا جولدانعان. ال، وسىعان دەيىن نيۋ-يورككە جاقىن جورج سوروستىڭ ءۇيىنىڭ جانىنداعى پوشتا جاشىگىنەن جارىلعىش تابىلعانى حابارلانعان بولاتىن.

وسىعان بايلانىستى فەدەرالدىق بارلاۋ باسقارماسى مالىمدەمە جاساپ، بۇل اقپاراتتاردى راستادى. ءارى باسقا دا لاۋازىمدىلاردىڭ مەكەن-جايىنا وسىنداي جولدامانىڭ بارۋى مۇمكىن ەكەنىن دە ەسكەرتتى. تەكسەرۋ ناتيجەلەرىندە بۇل جولدامالاردا بومبانىڭ بولشەكتەرى، جارىلعىش ۇنتاقتاردىڭ بولعانى ءمالىم بولعان. بۇل وقيعانى انىقتاۋ قازىر فبب-نىڭ باستى مىندەتى بولدى.

اقش-تىڭ بۇرىنعى پرەزيدەنتى باراك وباما جارىلعىش سالىنعان قوراپشانى اشپاعانىن، ءتىپتى وعان جاقىنداماعانىن ايتقان. ايتا كەتەرلىگى، باراك وبامانىڭ ۋاشينگتونداعى ءۇيى يۆانكا ترامپتىڭ ۇينە جاقىن ورنالاسقان. ءتىپتى، اراسى نەبارى 2 مينۋتتىق جول ەكەنىن باسىلىمدار ەسكەرتە كەتكەن. ال، حيللاري كلينتوننىڭ ۇينە جارىلعىش سالىنعان قوراپشا جەتكىزىلگەندە ول فلوريدادا ساپاردا بولعان. ال، ۇيىندە ەكس-پرەزيدەنت بيلل كلينتون بولعان.

فەدەرالدىق بارلاۋ باسقارماسى ءىستى تەرگەۋدى باستادى. فوتو: BBC/AP.

اق ءۇي بۇل شابۋىلداردى ايىپتاپ، مالىمدەمە دە تاراتتى. «جان العىش جولدامالاردىڭ» كوبى دەرلىك دەموكراتيالىق پارتيانىڭ ۇلتتىق كوميتەت توراعاسى دەببي ۆاسسەرمان-شۋلتس اتىنان جولدانعان. 2016 جىلى ونىڭ كوميتەتتەگى حات الماسۋلارىنىڭ Wikileaks سايتىنا جاريالانىپ كەتكەنى ءۇشىن دەببي ۆاسسەرمان-شۋلتس وتستاۆكاعا كەتكەن بولاتىن. كەزەكتى وقيعاعا بايلانىستى ول باق ارقىلى الاڭداۋشىلىعىن جەتكىزدى.

بۇل وقيعا اقش-تا 2001 جىلدان بەرگى ەڭ اۋقىمدى «پوشتا شابۋىلى» دەۋگە بولادى. 11 قىركۇيەك وقيعاسىنان كەيىن ۋاشينگتونداعى كەيبىر كومپانيالارعا جانە كونگرەسمەندەردىڭ مەكەن-جايىنا قاۋىپتى ىندەتتىڭ ۆيرۋسى سالىنعان جولدامالار كەلىپ تۇسكەن بولاتىن. سول رەكتى شابۋىلدان 5 ادام قازا بولىپ، 17 ادام قاۋىپتى ىندەتتى جۇقتىرعان ەدى.

بۇل وقيعانى انىقتاۋ ءىسى دە بىرنەشە جىلعا سوزىلعان. العاشقى تەكسەرۋ ناتيجەلەرى بويىنشا بەلگىلى بيولوگيالىق قارۋ بويىنشا ەكسپەرت ستيۆەن حاتفيل كۇدىكتى رەتىندە اتى اتالعان. الايدا، تەرگەۋ سوڭىندا ونى ايىپسىز دەپ تاپتى. ال، كۇدىكتىنى بريۋس ەدۆاردس يۆينس دەگەن ادامدى كورسەتكەن. ول 2008 جىلعا دەيىن بارلاۋ قىزمەتىنىڭ باقىلاۋىندا ۇستالدى، كەيىن ءوز-وزىنە قول سالدى. سوڭىندا بيولوگيالىق قارۋ ارقىلى جاسالعان شابۋىلدىڭ باستى ايىپكەرى بريۋس ەدۆاردس يۆينس دەپ جاريالانعان. دەگەنمەن ونىڭ ماقساتى جانە ارتىندا قانداي كۇشتەردىڭ تۇرعانى تۋرالى مالىمەتتەر فەدەرالدىق بارلاۋ باسقارماسىنىڭ قۇپيا قۇجاتتارىندا قالا بەردى.

ال، كەزەكتى شابۋىلعا قاتىستى ءالى دە ناقتى دالەلدى ايىپتار جاسالمادى. الايدا، امەريكالىق باق-تا كەيبىر ساراپشىلار شابۋىلدىڭ ارتىندا شەتەلدىك كۇشتەر تۇرعان بولۋى مۇمكىن دەگەندى ايتادى.

“The Qazaq Times”