Qıtay men AQŞ qorğanıs ministrleri Singapurda kezdesti. Foto: VOA/Tvitter.

Singapurda ötip jatqan ASEAN qorğanıs ministrleriniñ keñeytilgen otırısı ayasında AQŞ pen Qıtaydıñ qorğanıs ministrleri kezdesu ötkizgen. Bwl turalı bügin AQŞ Qorğanıs ministrliginiñ Oñtüstik Aziya men Oñtüstik-Şığıs Aziyağa jauaptı  ökili Devid Istburn (David Eastburn) öziniñ Tvitter paraqşasında jazdı.

Soñğı birneşe aydağı AQŞ-Qıtay arasındağı qatınastar tolqular men twraqsızdıqqa tolı boldı. Esteriñizde bolsa, AQŞ qorğanıs ministri Jeyms Mettistiñ qazan ayına josparlağan Qıtay saparın küşinen qaldırğan bolatın. Sondıqtan, bwl retki Mettis pen Qıtay qorğanıs ministri Uey Fıñhınıñ (Wei Fenghe) kezdesui älem aqparat qwraldarınıñ nazarına ilikti.

AQŞ qorğanıs ministriniñ kezdesudegi sözinde, Uşington men Beyjiñ qatınasınıñ qayşılıqtıñ jalğasa bermeytinin birneşe ret qaytaladı.

Oñtüstik Aziyağa isteri jönindegi Pentagon hatşısınıñ kömekşisi S'yu Rufu Singapurdağı bwqaralıq aqparat qwraldarına bergen mälimetinde: «Mettis pen Uey Fıñhı arasında resmi kezdesudiñ ötui eki eldiñ de qorğanıs salasındağı qayşılıqtıñ jalğasa beruin qalamaytının anıq körsetedi»,  – degen.

AQŞ-tıñ Ündi-Tınıq mwhit qolbasşılıq Bas ştabınıñ komandiri Devidson jäne AQŞ äskeri qolbasşılıq Bas ştabınıñ törağası general Denford Pentagon basşısımen Singapurda kezdesti.  Qwrama Ştattıñ joğarı äskeri şendileriniñ bwl kezdesuinde Ündi-Tınıq mwhit aymağındağı jergilikti küştermen selbese otırıp, Oñtüstik Qıtay teñiz aymağındağı Qwrama Ştattıñ ırıqtılığın saqtap qaludı mäselelerin talqılandı.

Oñtüstik Qıtay teñizi turalı AQŞ pen Qıtaydıñ wstanımdarı äli de bir jerden şığa qoyğan joq. Eki el arasındağı äskeri bäsekeniñ äli de jalğasa tüsetini bayqaladı. Degenmen, bwl retki kezdesu taraptardıñ qorğanıs salasındağı qayşılıqtardı retteuge degen qwlşınıstarınıñ da bar ekenin añğarttı. AQŞ-Qıtay arasındağı teñiz dauı tikeley territoriyalıq dau bolmağanımen, teñizdegi ıqpal küşine degen bäseke Uaşington men Beyjiñniñ wzaq strategiyalıq josparlarındağı ülken kereğarlıqtı körsetedi.

“The Qazaq Times”