Qazaqstannıñ Özbekstandağı elşisi "asa iri kölemde byudjet qarjısın jımqırdı" degen küdikke ilindi. Jergilikti agenttikterdiñ habarlauınşa, bwl turalı 16 qazanda Memlekettik qızmet isteri jäne sıbaylas jemqorlıqqa qarsı is-qimıl agenttiginiñ resmi ökili Janna Bastarova mälimdedi.

"Sıbaylas jemqorlıqqa qarsı is-qimıl wlttıq byurosı Qazaqstannıñ Özbekstandağı elşisiniñ asa iri kölemde byudjet qarjısın jımqırğanın äşkereledi. Ol jauaptı memlekettik qızmet atqarıp twrıp, Qazaqstannıñ Özbekstandağı elşiligi ğimaratın salu boyınşa atqarılğan jwmıstar turalı jalğan aktilerge bile twra qol qoyğan" dedi Bastarova.

Tergeu elşiniñ zañsız is-äreketinen memleketke 140 million teñgeden astam şığın keldi dep bağalap otır.

Qazaqstan Sırtqı ister ministrliginiñ baspasöz hatşısı Aybek Smadiyarov elşige qatıstı tergeu jwmıstarı ministrliktiñ bwrınğı jauaptı hatşısı Anarbek Qaraşevke qatıstı is ayasında jürgizilip jatqanın ayttı.

Sıbaylas jemqorlıqqa qarsı qızmet mausımnıñ 13-inde Sırtqı ister ministrliginiñ bwrınğı jauaptı hatşısı Anarbek Qaraşevti "iri kölemde para aldı" degen küdikpen qamauğa alınğanın habarlağan.

Agenttik ökili elşiniñ wstalğanı, ya basqa da tergeu şaraları turalı aytpadı.

"The Qazaq Times"