Joğalğan jurnalistiñ isi Saud Arabiyasına halıqaralıq qısımdı örşitti

Saud patşalığınıñ biligi oppoziciyalıq jurnalistiñ joğaluına baylanıstı halıqaralıq qısımda qalıp qoydı. Jeksenbi küni Germaniya, Franciya jäne Wlıbritaniyadağı SİM basşıları birlesken mälimdeme taratıp, Saud Arabiyasınıñ oppoziciyalıq jurnalisti Jamal Haşogginniñ joğalıp ketuine alañdauşılıq bildirdi jäne bwl isti jiti qarap tekseru kerek ekenin ayttı. Bwl iske qatıstı adamdardı jazalauğa şaqırdı. Biraq, bwğan qarsı Saud Arabiya biligi de mälimdeme jasap, Jamal Haşogginniñ isine baylanıstı qandayda bir sankciyağa qatañ jauap beriletinin mälimdedi.

Er-Riyadtıñ patşalıq biligin qatañ sınğa alıp kele jatqan arab jurnalisti Haşoggin 2 qazan küni Saud Arabiyasınıñ Türkiyadağı elşiligine kirgennen keyin iz-tüssiz joğalıp ketedi. Türkiyalıq BAQ onı Saud Arabiyanıñ agentteri elşilikte öltirip ketti degen habar tarattı. Biraq onı Saud ükimeti joqqa şığardı.

Jeksenbi küni jariyalanğan, Germaniya, Franciya jäne Wlıbritaniya SİM basşılarınıñ birlesken mälimdemesinde: «Biz bwl mäselede Saud-Türik birlesken jwmıstarın qoldaymız. Sonımen birge Saud Arabiyası ükimeti jağınan egjey-tegjeyli tüsindiru talap etemiz», – dedi.

Qwrama Ştattardıñ prezidenti Donal'd Tramp ta bwl turalı mälimdeme jasap, saud arabiyalıq jurnalistiñ isi anıqtalıp, oğan qol salınğanı rastalsa bwl isti jasağandar ayausız jazağa tartılatın aytqan.

Jeksenbide Saud Arabiyasınıñ resmi aqparat agenttigi habarlama tarattı. Onda atı atalmağan joğarı lauazımdınıñ mälimdemesi jariya etilgen. Mälimdemede, atalğan jurnalistiñ ölimine baylanıstı kez-kelgen ekonomikalıq nemese sayasi ürkitu-qorqıtuğa Er-Riyad biliginiñ qatañ reakciya tanıtatını eskertilgen. Tipti, kez-kelgen şaralar Saud patşalığı jağınan jauapsız qalmaytını da aytıldı.

Saud Arabiya biligin Jamal Haşogginniñ joğalu isine baylanıstı birqatar halıqaralıq qısımdar kütip twr. Endi 9 künnen keyin Saud Arabiyasında Future Investment Initiative (FII) dep atalatın halıqaralıq auqımdı investiciyalıq forum ötpek. Oğan Saud Arabiyağa investiciya saluğa ümitker älemdik birqatar iri kompaniyalar qatıspaq. Alayda,  Jamal Haşogginniñ joğalu isinen keyin jäne Saud patşalığınıñ jasağan mälimdemelerinen keyin bir qatar iri kompaniyalar atalğan forumğa qatısudan bas tarttı.

Osımen birge, forumğa qatısuğa tiisti AQŞ-tıñ finans ministri Stiv Mnuçin men Britaniyanıñ halıqaralıq sauda jönindegi ministri Liman Foks Saud Arabiya saparınan bas tartuı mümkin degen habarlar bar. Aq üydiñ mälimdemesinde Mnuçinnıñ forumğa baru-barmauı äli twraqtanbağanın ayttı.

FII forumına Saud Arabiyasınıñ mwrager hanzadası Mwhammed bin Salman qatıspaq. Ol qazir Saud Arabiyasında auqımdı reformalardı jüzege asıruğa tırısıp jatqanı belgili. Degenmen, forumnıñ birqatar demeuşileri, ıqpaldı media wyımdarı saparınan bas tartqanı belgili boldı. Bäri oppoziciyalıq jurnalistiñ joğalu isin bastı sebep etip otır.

Türkiya SİM basşısı Mevlut Şavuşoğlu Saud Arabiyasınıñ qazirge deyin tekseru isterine qatıspay jatqanın mälimdegen. Degenmen, Saud Arabiyasınıñ lauazımdıları mälimdemesinde, özderiniñ de şındıqtı bilgisi keletinin aytqanı bar. Al, isti tekseruge belsendilik tanıtıp twrğan Türkiya SİM tarabı Saud patşalığınan elşilikke kiruge rwqsat swrauda. Qalay bolmasın, Jamal Haşogginniñ joğaluı Saud Arabiyasınıñ biligine diplomatiyalıq qısımdardı küşeyte tüsti.

“The Qazaq Times”