Italiyanıñ Turin qalasınan bastau alğan qısqı Universiada alauı – Qazaqstanda. Tarihi sät esebinde alau tabıstau estafetası Qazaq sport jäne turizm akademiyasınan bastau aldı.

Qazaqstan men Resey elderi üşin mañızdı sporttıq şara turalı arnayı baspasöz konferenciyası wyımdastırıldı. Oğan Qazaqstan wlttıq studenttik sport Odağınıñ Prezidenti, FISU atqaru komitetiniñ müşesi Qayrat Zakir'yanov, Halıqaralıq studenttik sport federaciyasınıñ prezidenti Oleg Maticın, Resey Federaciyası ministriniñ orınbasarı, stats-hatşı Natal'ya Parşikova, Resey studenttik sport odağınıñ Prezidenti Sergey Seyranov, Krasnoyarsk ölkesiniñ sport ministriniñ mindetin atqaruşı Sergey Alekseev, «Direkciya Krasnoyarsk – 2019» WAO-nıñ bas direktorı Maksim Urazov qatıstı.

Qazaq sport jäne turizm akademiyasınıñ Prezidenti Qayrat Zakir'yanov: «Elimizde 2017 jılı ötken Älemdik qısqı XXVIII universiada sport tarihında eñ üzdik dep tanılsa, alau Qazaqstannıñ kieli 16 öñirin aralap, Almatı qalasınıñ «AlmatyArena» sport keşeninde janğan bolatın. FISU bizge eñ mañızdı missiyanı senip tapsırdı, al biz bwl jauapkerşilikti abıroymen atqarıp şıqtıq. Prezident N.Nazarbaev öz sözinde universiadağa deyin elimizdiñ jastarınıñ 15 payızı ğana sportpen şwğıldansa, şaradan keyin bwl körsetkiş 45 payızğa artqanın atap ötken bolatın. Bwl degenimiz bizdiñ universiadanıñ alğa qoyğan maqsatına jetkenin körsetedi», – dep saltanattı şaranı aştı.

Resey Federaciyası ministriniñ orınbasarı, stats-hatşı Natal'ya Parşikova «Men qazirgi Qazaq sport jäne turizm akademiyasınıñ tülegi ekenimdi maqtan twtamın, alğaş tabaldırığın attağanda qattı tebireniste boldım. Bügingi künde men sport äleminde ülken tabıstarğa qol jetkizsem, sol üşin osı şañıraqqa qarızdarmın dep esepteymin. Bwl märtebeniñ Almatı qalasına berilui –  tarihi oqiğa, al onıñ alğışartı 2017 jılı ötken Älemdik qısqı XXVIII universiada bolatın. Alau estafetasın Almatıda qarsı aluğa mwrındıq bolğan Akademiyanıñ Prezidenti Qayrat Qayrollawlına ülken alğısımdı bildirgim keledi», – dedi. Halıqaralıq studenttik sport federaciyasınıñ prezidenti Oleg Maticın universitettik spartakiadanıñ damuına zor üles qosıp äri osı bastamanıñ jarşısı bolıp otırğan Akademiya Prezidentine öz qwrmetin bildirip, Qazaqstanda sporttıñ zor qarqınmen damıp kele jatqandığın atap ötti.

Öz kezeginde söz alğan Resey studenttik sport odağınıñ Prezidenti Sergey Seyranov qazirgi tañda universitettik spartakiadanıñ mañızı artqanın, bwl jas sportşılar üşin olimpiadalarğa qadam jasaudıñ alğaşqı baspaldağı äri olimpiadalıq sayıspen para-par bolıp otırğanın ayta kelip, Reseylik, körkem gimnastikadan Olimpiadanıñ eki dürkin çempionı Evgeniya Kanaevanıñ sporttağı jankeştiligin ülgi etti. Ol 2008 jılı Olimpiada çempionı atansa da, 2009 jılı Belgradta ötken Universiadağa qatısıp, sporttıñ 5 türinen altın medal'ğa qol jetkizdi. Evgeniya Kanaevanıñ bwl tabandılığı barlıq sportsmenderge ülgi boluı kerektigin ayttı.

Ayta keter jayt,  alau estafetası  20-şi qırküyek Italiyanıñ Turin qalasında bastalğan. Almatıda FISU ökilderi men «Qısqı universiada – 2019» estafetasın wyımdastıruşılar kolbadağı alaudı Qıtay Halıq Respublikasına tabıstadı. Kelesi Alau  Estafetasınıñ kezeñi osı eldiñ Harbin qalasında  ötedi. Qırküyektiñ 29-ı estafetanıñ Reseydegi kezeñi bastalıp, sol eldiñ 30 iri qalası qabıldaydı. Sporttıq şara 2019 jılı naurızğa deyin jalğasıp,  studentter  oyındarınıñ   astanası Krasnoyarskte ayaqtaladı.

Baspasöz konferenciyasınıñ soñı saltanattı şarağa wlastı. Universiada alauın saltanattı türde Qazaq sport jäne turizm akademiyasınıñ rektorı, Ph(D) Bauırjan Zakir'yanov boskstan Olimpiada çempionı Ermahan Ibraimovqa tabıstadı.

Qazaq sport jäne turizm akademiyası elimizdegi halıqaralıq sporttıñ märtebesin arttıratın şaralardı wyımdastıra bermek.

"The Qazaq Times"