يتاليانىڭ تۋرين قالاسىنان باستاۋ العان قىسقى ۋنيۆەرسيادا الاۋى – قازاقستاندا. تاريحي ءسات ەسەبىندە الاۋ تابىستاۋ ەستافەتاسى قازاق سپورت جانە تۋريزم اكادەمياسىنان باستاۋ الدى.

قازاقستان مەن رەسەي ەلدەرى ءۇشىن ماڭىزدى سپورتتىق شارا تۋرالى ارنايى ءباسپاسوز كونفەرەنتسياسى ۇيىمداستىرىلدى. وعان قازاقستان ۇلتتىق ستۋدەنتتىك سپورت وداعىنىڭ پرەزيدەنتى، FISU اتقارۋ كوميتەتىنىڭ مۇشەسى قايرات زاكيريانوۆ، حالىقارالىق ستۋدەنتتىك سپورت فەدەراتسياسىنىڭ پرەزيدەنتى ولەگ ماتيتسىن، رەسەي فەدەراتسياسى ءمينيسترىنىڭ ورىنباسارى، ستاتس-حاتشى ناتاليا پارشيكوۆا، رەسەي ستۋدەنتتىك سپورت وداعىنىڭ پرەزيدەنتى سەرگەي سەيرانوۆ، كراسنويارسك ولكەسىنىڭ سپورت ءمينيسترىنىڭ مىندەتىن اتقارۋشى سەرگەي الەكسەەۆ، «ديرەكتسيا كراسنويارسك – 2019» ۇاو-نىڭ باس ديرەكتورى ماكسيم ۋرازوۆ قاتىستى.

قازاق سپورت جانە تۋريزم اكادەمياسىنىڭ پرەزيدەنتى قايرات زاكيريانوۆ: «ەلىمىزدە 2017 جىلى وتكەن الەمدىك قىسقى XXVIII ۋنيۆەرسيادا سپورت تاريحىندا ەڭ ۇزدىك دەپ تانىلسا، الاۋ قازاقستاننىڭ كيەلى 16 ءوڭىرىن ارالاپ، الماتى قالاسىنىڭ «AlmatyArena» سپورت كەشەنىندە جانعان بولاتىن. FISU بىزگە ەڭ ماڭىزدى ميسسيانى سەنىپ تاپسىردى، ال ءبىز بۇل جاۋاپكەرشىلىكتى ابىرويمەن اتقارىپ شىقتىق. پرەزيدەنت ن.نازارباەۆ ءوز سوزىندە ۋنيۆەرسياداعا دەيىن ەلىمىزدىڭ جاستارىنىڭ 15 پايىزى عانا سپورتپەن شۇعىلدانسا، شارادان كەيىن بۇل كورسەتكىش 45 پايىزعا ارتقانىن اتاپ وتكەن بولاتىن. بۇل دەگەنىمىز ءبىزدىڭ ۋنيۆەرسيادانىڭ العا قويعان ماقساتىنا جەتكەنىن كورسەتەدى»، – دەپ سالتاناتتى شارانى اشتى.

رەسەي فەدەراتسياسى ءمينيسترىنىڭ ورىنباسارى، ستاتس-حاتشى ناتاليا پارشيكوۆا «مەن قازىرگى قازاق سپورت جانە تۋريزم اكادەمياسىنىڭ تۇلەگى ەكەنىمدى ماقتان تۇتامىن، العاش تابالدىرىعىن اتتاعاندا قاتتى تەبىرەنىستە بولدىم. بۇگىنگى كۇندە مەن سپورت الەمىندە ۇلكەن تابىستارعا قول جەتكىزسەم، سول ءۇشىن وسى شاڭىراققا قارىزدارمىن دەپ ەسەپتەيمىن. بۇل مارتەبەنىڭ الماتى قالاسىنا بەرىلۋى –  تاريحي وقيعا، ال ونىڭ العىشارتى 2017 جىلى وتكەن الەمدىك قىسقى XXVIII ۋنيۆەرسيادا بولاتىن. الاۋ ەستافەتاسىن الماتىدا قارسى الۋعا مۇرىندىق بولعان اكادەميانىڭ پرەزيدەنتى قايرات قايروللاۇلىنا ۇلكەن العىسىمدى بىلدىرگىم كەلەدى»، – دەدى. حالىقارالىق ستۋدەنتتىك سپورت فەدەراتسياسىنىڭ پرەزيدەنتى ولەگ ماتيتسىن ۋنيۆەرسيتەتتىك سپارتاكيادانىڭ دامۋىنا زور ۇلەس قوسىپ ءارى وسى باستامانىڭ جارشىسى بولىپ وتىرعان اكادەميا پرەزيدەنتىنە ءوز قۇرمەتىن ءبىلدىرىپ، قازاقستاندا سپورتتىڭ زور قارقىنمەن دامىپ كەلە جاتقاندىعىن اتاپ ءوتتى.

ءوز كەزەگىندە ءسوز العان رەسەي ستۋدەنتتىك سپورت وداعىنىڭ پرەزيدەنتى سەرگەي سەيرانوۆ قازىرگى تاڭدا ۋنيۆەرسيتەتتىك سپارتاكيادانىڭ ماڭىزى ارتقانىن، بۇل جاس سپورتشىلار ءۇشىن وليمپيادالارعا قادام جاساۋدىڭ العاشقى باسپالداعى ءارى وليمپيادالىق سايىسپەن پارا-پار بولىپ وتىرعانىن ايتا كەلىپ، رەسەيلىك، كوركەم گيمناستيكادان وليمپيادانىڭ ەكى دۇركىن چەمپيونى ەۆگەنيا كاناەۆانىڭ سپورتتاعى جانكەشتىلىگىن ۇلگى ەتتى. ول 2008 جىلى وليمپيادا چەمپيونى اتانسا دا، 2009 جىلى بەلگرادتا وتكەن ۋنيۆەرسياداعا قاتىسىپ، سپورتتىڭ 5 تۇرىنەن التىن مەدالعا قول جەتكىزدى. ەۆگەنيا كاناەۆانىڭ بۇل تاباندىلىعى بارلىق سپورتسمەندەرگە ۇلگى بولۋى كەرەكتىگىن ايتتى.

ايتا كەتەر جايت،  الاۋ ەستافەتاسى  20-ءشى قىركۇيەك يتاليانىڭ تۋرين قالاسىندا باستالعان. الماتىدا FISU وكىلدەرى مەن «قىسقى ۋنيۆەرسيادا – 2019» ەستافەتاسىن ۇيىمداستىرۋشىلار كولباداعى الاۋدى قىتاي حالىق رەسپۋبليكاسىنا تابىستادى. كەلەسى الاۋ  ەستافەتاسىنىڭ كەزەڭى وسى ەلدىڭ حاربين قالاسىندا  وتەدى. قىركۇيەكتىڭ 29-ى ەستافەتانىڭ رەسەيدەگى كەزەڭى باستالىپ، سول ەلدىڭ 30 ءىرى قالاسى قابىلدايدى. سپورتتىق شارا 2019 جىلى ناۋرىزعا دەيىن جالعاسىپ،  ستۋدەنتتەر  ويىندارىنىڭ   استاناسى كراسنويارسكتە اياقتالادى.

ءباسپاسوز كونفەرەنتسياسىنىڭ سوڭى سالتاناتتى شاراعا ۇلاستى. ۋنيۆەرسيادا الاۋىن سالتاناتتى تۇردە قازاق سپورت جانە تۋريزم اكادەمياسىنىڭ رەكتورى، Ph(D) باۋىرجان زاكيريانوۆ بوسكستان وليمپيادا چەمپيونى ەرماحان يبرايموۆقا تابىستادى.

قازاق سپورت جانە تۋريزم اكادەمياسى ەلىمىزدەگى حالىقارالىق سپورتتىڭ مارتەبەسىن ارتتىراتىن شارالاردى ۇيىمداستىرا بەرمەك.

"The Qazaq Times"